Mi sikkuno si kaaki  ɗayɗii saamii

Ko pilitti, piindi e ndimndi saatii, si ndiyam saaƴii 

Mi sikkuno nde Conte nawyunoo o nawni o faatii

Ko ɗon Dadis immii wippii laamu Gine hawtaangu o ardii 

Mi sikkuno fodoore Dadis suɓo hino saatii

Ko ɗon o firti fodoore makko e hoore bewre o ardii 

Guinenaaɓe buy faatii e fewndo fewjoore Dadis 

Ko ɗon Tumba immii dankarannii dartii jippiri e Dadis   

Guinenaaɓe seedii cippiro Tumba e Dadis 

Nduggu hentii pinka fetti Tumba muti Dadis jukki sortii 

Guinenaaɓe fodaa suɓo e hoore laaɓal si hewtii 

Nduggu hentii Conate, Kompaore e Dooree ardii 

Ginenaaɓe suɓii, halfinaaɓe suɓo inni Conde foolii 

Mi sikki goonga waylaama enee ko pellet Sellu foolii 

Sikke alaa pellet Allah hino anndi  Sellu ɓe tooñii 

Awa hannde ƴiiƴam e gonɗi Wiimiye en hibbii ilii 

Sikke alaa pellet yoga e fewjooɓe Gine ɓen  tooñii 

Ko honɗum innitorɓe danndugol hakkeeji neɗɗankeyaagal  jooɗii 

Wiimiye yananaama piyaama jaɓtaama yoga sokaama buy maayii

Ko honto woni diinayankooɓe hara ɓe munni kaa ɓe huccii 

Wiimiye! Waasere  needi e yawre kawte heewii

Wiimiye accu hakkee taw haanɗo yoɓtaade neeɓnii 

Wiimiye! Immo daranoɗaa ndimu maa e leydi maa a mulii

Wiimiye! iimmo! dadito darto gaño maa, rewɓe e fayɓe wulli 

Wiimiye ! 

Annditu si cuucal tawtii kuugal haray ko poolal e maloore saatii 

Kɗl: Mohamed Jalloh (iwdifalahi), USA.  

Mawɓe Fuuta maaki: Wa’u wano mi wa’i ko waandu e ɓiɗɗo mum.

www.peeral.com