Nde Alla wallunoo mi njaltu-mi e jalol

Nganndu-mi gooto bonɗo ko gacce lenyol

Sabu ceemedel nan ɗoo e leegal ngal

Ko ngel bonngel bonnowel enɗam

Sabu Alla e maggel wonde coɓngel

Mi yiɗaa hay haalde innde maggel

Hingel sorsorti yaha e mbeddaaji

Subaka ko o jahdiiɗo naange

Jemma ko o jahdiiɗo lewru

Coɓngel nyallintaa wallintaa

O yaltataa suudu surgaaɓe

Alaa ko haali cukkel alɗuɓe

Elee coɓngel resaaka

Coɓngel jolii e laaɗe taccii jeereende

Goowngel jolii e laaɗe takkii oogaandi

Laana njoorndi bippii mo haa caggal leydi

Himo meymeyta haa o naati e ndii ngenndi

Ngel woni toon njaatigi hooƴaaɓe

Hay ɗum dee himo wondunoo e dewgal waɗde gila

Ndeen o seera o weddaa

O tiggaa haa muusi o artiraa

Worɓe moƴƴuɓe nganyti mo, hay gooto yiɗaa

Mo teetti jiiba fowru ne maa woppu

Mo fayni mbabba faynani dute

Nde mbaroodi yahi kala pobbi ko lomtiiɗi

Nde wonnoo bonngel ko donngel

Ngel waawataa muk selde e ɗii laabi

Mo o yiyi fof himo ndaartira ɗum pijdiigu

Sabu ɗaminaade e mum wuundu

Kala koɗo garɗo himo yiɗi ɗum humpitaade

Miɗo anndi hiɗon njiɗi mo anndude

Kono kurka bonɗo jaraani anndeede

www.peeral.com