kdl: Sanusii Jallo Boowoy

ALLAAHU ko an woni Siforɗo Surrugol

Ayyibaaji ɓurɗi kaanugol.

Ko an woni Siforɗo yurmingol

Hay neɗɗo ɓurɗo derfugol.

Miɗo hoolii wano min e tuunugol

Alaa ka suusu-mi daragol

Holla faale sukkina toragol

Ɓe ronkkan-mi raɗagol

Jokkina hoyre e yaynugol

Allaahu ko ka damal maa suusu-mi dawgol

Mi sukkina toragol e fattagol

Hara mi hulaa faɗugol

Mi tijjaaki hoyugol e sooyugol.

Kala aanuɗo ko an haani feewtugol

Si tawii himo huli wirtagol.

Kala weltiiɗo ko an haani yettugol

Si himo faalaa ɓeydagol.

ALLAAHU ɓantugol neɗɗo e liɓugol

No fotane yaawugol.

Min ko annuyee ɗoftagol

Yamiroore maa naadimmi e toragol.

Ɓaa faaleeji am ɗin hiɗa ɓurimmi anndugol.

Nafaaji am ɗin hiɗa ɓurimmi aynugol.

Tama’uuji am ɗin ko an waawi ɗi huɓindagol.

Miɗo hoolii ganndal e ngalu

Doole am waawaa heɓugol

Duuɓi e cellal loore am waawaa haɗugol.

Maral e malal wakkilaare am waawaa moftugol

Ɓantal e ɓadal golle am waawaa nafugol.

Jiidi e peewal ɓuttu e pottal ko an waawi yeɗugol.

Ko a siforɗo ɓeydangol

Kala okkaaɗo jokkini weltagol

Ko an woni waawuɗo surrugol

Kala aanuɗo huli wirtagol.

Ko an woni waawuɗo danndugol

Kala doguɗo ari fattagol.

Ko a woonduɗo wallugol

Kala toonyaaɗo ari wullitagol

Ko a siforɗo liɓugol

Hoolorɓe bewre e mawnintinagol.

Ko a siforɗo ɓantugol

Aadinorɓe dewe e yankinagol

Ko an woni waawuɗo fuuynugol

Eɓɓooje hoolorɓe gere e lancugol

Ko an woni waawuɗo bonnugol

Pehe hoolorɓe gaara e fiɓugol

Ko an woni waawuɗo wirtugol

Hoolorɓe korte e fiɗugol

ALLAAHU ko an mi woni moolorgol

Bone ɓee ɓe mi woni e jantagol

Hoolorɓe kaatime e yollugol

Hoolorɓe ramli e toɓɓugol.

Hoolorɓe koode e limugol

Hoolorɓe ceede e sarkugol

Hoolorɓe talsamu e huɗugol

E kala ko yejjitu-mi moolagol.

Hara no hattanaa lorrugol.

Ko an tun waawimmi danndugol.

Bone ɓen yooliiɓe e welsindagol.

Suɓiiɓe bonnugol

Ɓe weldi e Saytaane fii lorrugol!!!

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

Siɓɓe Janngooɓe tedduɓe: Awa ɗoo on wattay hakkil fota e ɗii gimɗi feƴƴuɗi, hara on sikkaali mi aybin Gollirooɓe Talsamu, maa Ramli, Maa Gaara e Palle e Ceede e ko wonaa ɗun.... Min e wi’i am mo kala no waawi meccinorde ko faalaa, si ko Allaahu Bajjo Seniiɗo on, o hoolore haray o hulɓinaaki ka huuwondiral. Bajjo Geno on daalii ka Deftere makko reenaande e wilagol:

قل كل يعمل على شاكلته فربكم أعلم بمن هو أهدى سبيلا )) إسراء آية 84 )).

(( Maaku “yo Nulaaɗo” mo kala yo gollu e noone mu’un ko Joomi maa anndi ko hommbo ɓuri feewude laawol)). Simoore Lisraa’i, Aaya 85.

Sabu Faayre woo ɓuraa Yeebugol Saa’iiji mum e Saatugol golleeji yimɓe; Yejjita golle mu’un.

www.peeral.com