Kɗl: Tijjaani Maalun Bari, Paris, Faransi.

Heɗitee lam musiɓɓe  mi sifanoo on yiɗude senndodugol

E mon ko mi tawaa hannde  faale hollugol on hollugol

Hannde kam mi yi’ii ko yurmi ko mi alaa fehre ittugol

Nyalorma teɗɗan mi hewtiti ka galle am miɗo faalaa foowtagol

Waalii-mi haa ɓooyi miɗo deƴƴiti ka faale ɗaanagol

Mi waalii mi waylitii haa neeɓi mi ronki soƴƴagol

Mi ɓoylii mi ɓoylitii ka nder danki mi ronki huylagol

Mi ronki munnagol, mi ronki ɗaanagol, mi ronki foowtagol

Tun nanu-mi kot’am pulaar e jaaj’am fufulde hino hu’a “faabee” mi yalti ndaarugol

                                 Mi ɗaɓɓi ɗon fow mi yi’aali ɓe, mi ronki faamugol

Tawi jaka hiɓe woɗɗitii seeɗa mi ƴeŋi ƴeewugol

Felsu-mi ko’e ɗiɗi yimɓe jooɗiiɓe mi dogi ndaarugol

Tawu-mi jaaj’am fulfulde hino lappii lattinii mi huli ɓadtagol

Reedu am taƴi ɗon laaw ! mi sikki o faala maayugol

Innu-mi banndiraawo ko  waɗu maa ? Kori accu punnagol

Mi wi’i mo wonde o alaa faataade yo o ɗuytu soynagol

Kono o jaɓanaali lam, o waalii ɗon o ɓeydi luukugol

O fofii ɗon, o foccii las o ɓeyditi wullugol, haacugol

Kot’am pulaar maakani lam mi tawi himo e fii jeejugol

O jeejii haa o ronkii kono oya jaɓaali immagol

O lamndike  haa o jiɓike ko  oya woni e wullugol

O jaabike ko suno ngo o wondi ngon o ronki heƴnugol

O wi’i ngo’o miijo ngo o wondi alaa e ɗuytagol

Annde nde’e hino jokki mo ka o yahri woo nde jaɓaali yiltagol

Naamnii-mi ko woni ngon suno huɓɓungo wano yiite salii ɗaanagol

Hino dulbitoo ka nder ɓernde makko jaɓaali nyippagol

Mi torike ma ja’m fulfulde haalan’am ko sonnju maa accu hersugol

Yeewt’am fow mi ndaara si tawii miɗo gayna wallugol

Si miɗo waawa tun mi aamataa ma, yo jaaja, yeetagol

Si ko liddu ɗum kadi, mawn’am mi aamataa ma yeetagol,

Ko haanu-ɗaa waɗude fii yo wonkii maa ɓeydu nyiiɓugol

Cilon wa ley loonde, ɓernde maa waawa ɓuuɓugol

O ndaari -mi haa huunde juuti-lutti o ɓeydi mbojjugol

Ardiri tati-tati gonɗi makko, o waawaali yeewtugol

Kolonngaaje makko heewi tew gonɗi wa si o faala ɓinnyugol

Min tigi gite am huuli gonɗi mi eppi wullugol

Kot’am pular nanngi men juuɗe o wi’i accee mbojjugol

Pulaar nanngi junngo am fawi e sookeewo makko o pooɗi ɓadnugol

O dewti ɗe ka sala fulfulde o mowli jeejugol, yurmegol

Men jeeji ɗon haa jaaj’am fulfulde ɗuyti ɓinnyugol

O lisi non seeɗa o fitti gonɗi o woppi fesugol

Woni tun seeɗa wa tikkuɗo o halbi fota sonkugol

Nde nanu-mi kan hawa mi maƴi ɗon mi ɗesi yer diwnugol

Miijii-mi sikku-mi fulfulde feetu kaa o faala iiragol

O wi’i men mi feetaa mi haangaaka mi ronku faamugol

Faamugol, faltagol, min mi alaa e faamude faamugol

Haɗta mi wulla wa mayraaɗo ɓay mi ronku faamugol

Mi fesay, mi wulla, mi piitoo ɓay mi ronku faamugol

Ko honno Fulɓe selirta ɗemngal mum mi ronku faamugol

Ɓe jooɗoo ɓe mornoo, haa pulaar yeeboo mi ronku faamugol

Haala pulaar ka’a yilmiino Pullo gooto ronku nyawndugol

Ɗemɗe goɗɗe arii yaɓɓii pulaar haa jooni non ka ronku fuufugol

A haalay tun Pullo wi’e si ko pulaar miɗo waawi wowlugol

Si a heɗiti Pullo hino wowla hannde pulaar a eppay tuutugol

Konnguɗi tati wowlaaɗi e pulaar hino hikkoo ɗon jillugol

Tati arayɗi  ɗin ɗon ko e ɗemɗe go’o o woni e ƴettugol

Si Pullo fuɗɗorii yeewtere mum pulaar neeɓa tun seeɗa o wona e eggugol

Tawa yeewtugol piiji buy e pulaar hino saɗtani mo ken feewnugol wowlugol

Nyalɗi e lebbi e limoore fow e pulaar Pullo accii wowlugol

Si a jenti Pullo Gine oo na haala miijo-ɗaa limugol

Nde o ukkiti hen faransi woo wallinaa kollum faale anndugol

Ko haa seeɗa tun a taway a waawataa moftugol

A taway ko konnguɗi ɗiɗi pulaar jeeɗiɗi  suɓugol, jillugol

Seeɗa seeɗa o egga, teertoo pulaar waɗta faransi tun parlugol

Mono yeddi non yo heɗito nde Fulɓe Gine nanngi yeewtugol

Yo o wallin kollum kum tuma kala ɓe fuɗɗii koozugol

Fii politik, maaɗum, ko wa’i non si ɓe fuɗɗii diskitugol

A taway ko hollu-mi ɗo’o kon ko goonga wonaa mabbugol

Wonaa non hoynugol, yawagol ŋinyugol Pullo  ko furnyitugol

Ellaaji e nyabbuuli ubbiiɗi e men ɗi haanu-ɗen nyawndugol

Si en nyawndaali kerbe men nyawu men  pulaar wontay jukkugol

Si ɗum yahrii nii, heɓɓitaaka ɓeydee ƴulen feewnegol,

Haala men fulfulde sertay tun, cariika men ɓurta lurrugol

Wano kiriyon maa kereyol haala men ɓurta helugol yirbugol

Ka nyola yilma, kaana kas hara hay gooto faalaaka ɓadtagol

Oo aybe ɗo’o non wonaa Fulɓe Gine tan woni mo huurugol

Fulɓe  Najeeriya, Kamerun too kadi  hino ɗuuɗi jillugo, jillugol

Hiɓe hela mahdi ɗemngal fulfulde hiɓe heewi ukkitugol

Ɗemngal faransi e hawsa nde hiɓe yeewta hiɓe heewi jillugol

Maasinankooɓe e Liptaako ɗemɗe mun heewaali laaɓugol

Araabeere, Sudan, Caad Fulɓe ton fulfulde ɓe ɗuytii haalugol

Hay Fuuta Tooro to pulaar woni janngeede e winndegol

Hay si ɓen sitta ɓe heewaa jillugol, ɓe heewaa nyortugol

Nde tawnoo ɗemɗe maɓɓe hino seerti ɓe waawani moftugol

Ɓe alaa e yannyude seeɗa e Fuutaaji ɗiya ɓe eɓɓana ƴettugol

Toon seeɗa, ɓe wallitora konguɗi men ɓe ɗala huccugol

Pulpule heddiiɗe, ɗe ɓe alaa tawii le hiɓe haani anndugol

Hannde nde Pullo hino winnda yo tawu ɓeya hino waawi faamugol

Etee accon winndude deWbo ɓay ɗum alaa ka e wowlegol

Artirgol kalfe go’o ka konnguɗi ɗe alaa ka e wowlegol

Ɓurtay tun sertinde ɗemngal men palaar ronken faamugol

Miɗo, mboɗo, meɗa, mbeɗe, ɗum ɗuuɗi seertugol fertitagol

Eto-ɗen darnito-ɗen suudu pulaar ndu ɓurta nyiiɓugol tabitugol

Huɓɓito-ɗen giitel pulaar ngel ɓurta jalbugol, ndaygugol

Eto-ɗen haa pulaar jalba tal wa naange, aduna fuu waɗta yomnagol

Eto-ɗen haa pulaar laya saako yimɓe fof waɗta ka yeewtugol

Kori hollen aduna oo pulaar ko neldaari yimɓe fow fii faabagol

Wonaa Pullo tun haani wasorde ka, neɗɗanke fop hino haani mantugol

Kori yoo Fulɓe ! si en jooɗike haa pulaar lannii mulugol, yeebagol

Feewndo men ɗoo, en dankaaki ɗum wonay semtugo maa hersugol

Mawɓe men adinooɓe dankiiɓe pulaar haa waawi heddagol

Guluuje duuɓi pulaar hino dankaa dankitaa fii danndegol

Haa hewtii feewndo men, pulaar hino haani wuurugol

Si ɓiɗɗo jaasii, ko ndonndi baaba o wonata e weddagol

Hawkuɗo ndonndi baaba, wonaa ɗii halal nannganen tammbagol

Eto-ɗen haa geɗalɓe men arayɓe waawoya nanngugol

Pitilol pulaar ndee foyre neeɓunde, ɓe waawoya aynugol

Haa ɗemngal pulaar ronee kadi wontira duumagol

Poomaa ; pulaar luttee janngegol, janngegol, janngegol

Poomaa pulaar jannginkinaaka, pulaar luttee jannegol

Ngaddamaaku e taariika Fulɓe, taali mum luttee anndegol

Si janngaama pinal Pullo, gimɗi e pulpule luttay fiinugol

Kori yoo! ɓayri leyɗe seedi ko pulaar tun luttu-ɗen hawtugol

Si pulaar mutii maaɗum jilɓii Pullo wontay hayrugol

Si en wakkilaaki, dariɗen ɗum janngo wontay hersugol

Tuma darnaɗen janngo yeeso koohooɓe hanki fii lamndegol

Ceerno Sammba Mommbeyaa winndii buy ɗum haanaa majjugol

Ceerno Aliyyu e geɗalɓe mum winndii ɗum hino haani anndegol

Raamatullaahi Telikoo, e Cerno Bela men ko winndi kon hanaa hayrugol

Ɓen waliyaaɓe fow winndii ko ɗuuɗi ɗum hino haani anndegol

Yero Dooro maa Murtuɗo fow walli ɗum hino haani waccegol

Bayla e Seck Abdul en fow hino haani weyneede fii jantegol

Christiance Seydu, Soh Alfa, Baumgardt en fow hino haani jaarnegol

Aliyu Muhamadu, Henri Tourneux en fuu hino haani jaarnegol

Umar Gonngoore e Issa Jallo en e teemeɗɗe luttuɓe ɓe mi waawa jantagol

Ka, Sylla, Kumanco hay gooto mi yejjitaa ko mi joom jaarnugol

Daraniiɓe pulaar/fulfulde, fii no feewira binndi maa jannugol

Wiɗotooɓe, ɗaɓɓita fow ngam pulaar no semmbira hino haani jaarnegol

Hampate Aamadu ŋanaajo moftuɗo gannde hino haani limtegol jaarnegol

Kori Fulɓe accee annditon, waawugol faransi, enngele wota haɗu on janngugol

Pulaar ko ɗemngal ngal miliyonji haalata, selee hulugol maa hersugol

Kori kudugol e ɓernde mum wi’a ko mi Pullo si a waawataa wowlugol

Ko selli Pulaar, anndu dey ko kudataa ko’o  iidataa, hay si ko a Bah yettegol

Ŋari maa gurum e hakkil ɗum dey annditaa wonaa Pullo jeynagol

Wonaa an tun mari ɗum, ɗum dey gelo-ɗaa yo Pullo heɗor faamugol

Ko pulaar rokka-ɗaa, si a waawaali hiwugol ko waawataa gaynugol ?

Si wowaa ɗum accu ɗon, pulaar ko naange nge cootinji mum woni malƴugol

Si naange yaltii anndu dey junngo waawaa ommbugol maa suddugol

Ko ɗum ja’m fulfulde sakkitii haalugol o fuɗii huccugol waynagol

Ado non o yahude o yamirii en, ɓee ɓiɓɓe men janngingol, jannugol

O jeejii en dey hakkunde men yeewtugol pulaar yanndi yeewtugol

Janngen pulaar accen ka winndugol kori sincugol maa hottagol

O wi’i dey mbiimi, wii-mi e wi-maa-mi en fof jojjii immagol

Etoo haa pulaar wonta e heyɗugol, huunde fow waawee wowlegol

E makka, gannde fow e pulaar waɗtee, eggegol, firtegol, winndegol

Rajoo, tele, jaayndeeji internet e kawtite mawɗe fuu pulaar waɗtee yeewtegol

Pular ko ɗemngal laaɓungal, ko naange nge cootinji mum luttata jalbugol

Ko saala woo si naange yaltii anndu dey junngo waawa ommbugol maa suuɗugol.

O hucciti o nanngi laawol, himo yaha, himo yima, himo yima himo yaha, himo wulla jala, himo wifa juuɗe, himo hayla hoore, himo yaha yeƴƴitoo, himo ewnoo yakaseede mon yo Fulɓe, yakaseede mon!!!

Min e kotoo pular meɗen darii meɗen ndaara, meɗen mugaa, meɗen soynii, meɗen udditi kunndule meɗen jiɓii ko men wolwa, mi tawi yo mi artu ka suudu am belajo’o mi waaway ɗaanaade seeɗa, ɗaaninkinagol maa huylagol. 

www.peeral.com