21/10/2009

Alla rokki on gnnadal, hoynu-ɗon ngal

Alla rokki on ganndal, bonnu-ɗon ngal

Alla rokki on ganndal, asu-ɗon ubbu-ɗon ngal

Alla rokki on ganndal, on maritoraali ngal

Alla rokki on ganndal, ngam dannditoron ngal

Alla rokki on ganndal, moneeji ɗin  ittiron ngal

Alla rokki on ganndal, toonye ɗen donkiniron ngal

O lammini on nyaaki, O lamminiri on ngal ganndal

Nyawndano-ɗon kaafaaje, nyawndoron ngal ganndal

Nyawndano-ɗon kure e gaawe anyɓe mon ngal ganndal

Fanoro-ɗon galleeji mon ngal ganndal

Bonɓe hula jawle mon sabu ngal ganndal

Wonana on heedo e anyɓe mon ngal ganndal

Kono dari-ɗon harmin-ɗon ngal

Asu-ɗon haa luggi ubbu-ɗon ngal

Tooonye hino iwra nano e nyaamo sabu waasude ngal

Hannde ɗum hino waɗa nyannde kala, sabu on maraano ngal

On waaloto foccano-ɗon maayde haa nyannde darngal

Si on waɗtaali yila e majjinde yimɓe mon, majjinora ngal

Anyɓe mon, dow e ley hino gollitira ngal, nafitoroo ngal

Ɓayti on maraano ngal dokkal gollitir-ɗon ngal

Ngal dokkal ngal Alla rokki on, on teddinaano ngal

Nafoore ganndal ko marugol, yimɓe maa walliraa ngal

Yawaare e toonye ittiraa ngal, dammbe maa hiwiraa ngal

Moneeji momtiraa ngal, toonyaaɓe faaboraa ngal

Jawle e keyeeji  reeniraa, jemma e nyalorma hiwiraa ngal

Wonaa asugol haa lugga ubba ngal, daroo waajoo harmina ngal

Ko dokkal Alla, ko toownugol ngal dow teddina ngal

Fii yeeso, si Alla yeɗii ma ganndal, anndu ko dokkal

Dokkal Alla ko teddinteengal, a teddinay ngal

Wonaa daragol harmina ngal, asa haa lugga ubba ngal

Malla huɓɓa yiite mawnge, ukka ngal ton sumna ngal

Ko Alla tan woni Jooma ganndal

Wonaa aan fes, aan on Alla luɓe ngal

Ngal ganndal ɓalewal teddungal, artiroowal teddungal

Yawaare, toonye e moneeji ko ngal ittoowal

Ko ngal fanorteengal, mareteengal dannditorteengal

Ko waɗi hiɗa harmina ngal, hiɗa anndi le wonaa aan jeyi ngal?

Ko waɗi hiɗa aybina ngal, hayfina ngal, salo-ɗaa nyawndirgol ngal?

Ganndal ko luɓal, ko dokkal Alla teddungal, teddinteengal

Ko dokkal Alla mawngal, hittungal, reenoowal dammbe e teddungal

Awa artir ngal kisan, yimɓe naftora ngal

Hannde ko feewndo maggal, ko jamaanu maggal

Ngal ganndal ɓalewal ko dokkal Alla teddungal

Wonaa hay gooto e men jeyi ngal, wota mo harmina ngal

Awa, artiren ngal, artiren ngal kisan, hewtii ka naftoren ngal

Awa ko marugol seere ngal ganndal Alla ɓalewal

Teddinen ngal, nyawndoren ngal, fanoren ngal

Kɗl: Saajo Bah

www.peeral.com