|
11/01/2010 Ndee yimre aroore les ɗoo, ko wootere e jime yimanooɗe e Nyalngu Pinal KJPF, Catal Noisy-Le_Sec, Faransi, nyannde 26/12/2009. Ɗuum ko nyalorma innitiraaka teddiniraa Cerno Murtuɗo Joop. Ko kanko –Alla hinno- maakunoo: Ko Pulaar ɓurani lam neene am, ko Pulaar ɓurani lam baaba am, ko Pulaar ɓurani lam ɓiɗɗo am mo mi jibini, ko Pulaar ɓurani lam debbo am mo mi resi, sabu so Pulaar wuurii mi wuuray, so Pulaar maayii mi maayay… Ko Moodi Demmbel Sal, gooto e yimiyankooɓe men kelɗuɓe neldi ndee. Peeral hino waɗta e juuɗe mon ndee yimre heewnde fiira e nafoore, inneteende Nyoƴƴitel:
Hanki ko law, lelii-mi no kurkayel Buklet baklet e mbalndi am no cukayel Law tawi mi sastaama e ɗoyngol Miin fof mi moɗaama e ngol jamyamol Hiimo hiimo ari e am no pinndinteeɗo e koyɗol Kaftii-mi, toknyii-mi, ɗuum fof dey ko e ɗoyngol Cooynii-mi dental mawngal no wonɓe e suudu Kaaba banngagol Niwnii-mi, kamɓe fof ko ɓe Fulɓe to kadduki e nyaragol Ɓooytaani njii-mi yimɓe ɓee fof memii leydi e ɓarfinagol Haa heddii gorko gooto dardaro e maɓɓe tiimgol O juuwi yimɓe ɓee, omo wiinyoo, no gonɗo e jiilagol Haa o nanngi gooto e maɓɓe mo woni e pooɗgol Oon e lemayru rewi e makko, haalaani hay konngol Ma o yottii nde keɓtin-mi Feetere Jeyngol Gor’am omo nanngi e Mammadu Abdul Sek gorko mo Poolel Dullinaaɗo e ngoo junngo, fiɓaaki, ɓoccitaaki ellee colel O suuti junngo makko o wiyi mo : “Feetere Miny’am Gorle ngartii e maaɗa giɗ’am Mi yamiraama, mi fiilii ma Farba lenyol am Duŋduŋaaji taane maa ndillu haa too, to Aanyam Sabu ko a Jahdoowo e Katante Lenyol am Ibiraahiima Umar Kan gorko mo Yeroyaaɓe Aanyam On taƴtat maayo Njahon Jowol hay so ko e njuuwam Ƴaaŋon Sammba Cooyel Bah Baamum Tokar’am Tafon konu haɓotoongu humambinnaagu e lenyol’am Ruttu e haŋki ngol lenyol, a nanii Feetere Jeyngol ! Wiɗtu, wiinyo ko men gila daande "NIIL" haa diiwaan Gorgol Oto ngawlaagu maayo, so ronkii ɗuum ko men koo wontata ko daarol Yoo diine yahdu e ko men no paamir-ɗaa nii Katante Lenyol Mbujoɗee yimɓe ɓee haa keɓon fellitɓe no Sammba Cooyel Barogal jowol" Ɗoon tan ngirnyitii-mi no garaaɗo Nyoƴƴitel Lemii-mi, mi yiyaani hay neɗɗel Kettindii-mi, mi ejaani hay ɓiicaango comel Paam-mi ngonnoo mi tigi ko e koyɗol Mbeltii-mi en cuɓanaama ɗowooɓe e ngol bolol Mammadu Abdul, Sammba Cooyel e Katante Lenyol Ko on tammbiiɓe njikkeeji e yaakaare ngol lenyol Yoo Joomiraaɗo rokku on nguurndam e balɗe juutngol O moƴƴina wattannde mon e kuuɓgol Aamiin, aamiin yaa ko Murtuɗo tampi e ngol lenyol. Kɗl: Demmbel Sal, Faransi. Miiro, 25/12/ 2009, njamndi 04:06 bimmbi. www.peeral.com |
