|
Kɗl: Tijjaani Maalun BARI, Paris, Faransi. Majjiraaɗo keyee jalataa Si ko kaŋŋe maa jaaman Pellet! sunno ɓernde woopataa Kono si neeɓii, ɗen no yejjitaa
Majjiraaɗo giɗo Ɓernde mum ɓuuɓtataa Wonkii makko poomaa deeƴataa Dewi ! e ka hikkorɗaa ? Laana weelii weeyii E ka fokkitaa? Sappo e tati lewru jalbii Miɗo lonyii sera ɗaa Ko woowi si leele moosii jalii Hiɗen kenkita jala akkaa. Wa si ɗaayɓe nyaamii haarii Fottii e yaasi no fijaa No ragaa ! Hannde non kelle heltii A yahrii wa mo artaa Hanki hari hiɗen wondi Bimmbi e kiikiiɗe en sertataa Giɗo! e ka hikkorɗaa? A mutii taw nde artataa? Hawa am hino hirnditoo Hakkunde pelle e ayɗe Fuuta Hingo nootitoo Noppi jootii faale Nande hito maa Welngo ngo mettataa! Gite kalkaltii hino ɗaɓɓa maa Nano e nyaamo e ka hikkorɗaa? Ɗe mbojii ɗe wojjii cos Wa mutal naange oonyiinge nge feewataa Hacceteenge ka tatte kammu hinge mutaa Kolonngaaje hibbii gonɗi ilayɗi Juur ! wa jurnde nde ɓeeɓataa E ka suuɗorɗaa giɗo mo hayrataa? Ɓernde heewii tef giggol ngol ɓeeɓataa Nde barmii barme mo sellataa Kori artu noon e ko sabbiɗaa ? Ɓanndu fooyii Miiji ɗuuɗii Hakkille oorii Wonkii seɓitike Miijo fii maa E ka suuɗiɗaa ? Si a yejjit’am eto annditaa Giɗo maa bajjo mo waylataa Poomaa giggol oon, lannataa Fulɓe wi’ii : « giggol nawyay maayataa » Nyaaki wommbii piindi Kambo guugii Maaro sawtii Cale fiinii futtii Ndiyam saaƴii Na’i huunii Si a yaawu e si a neeɓu fow Giɗo am miɗo habbi maa Giggol heeway hibbay Kono ngol ɓeeɓataa Ngol nawyay kono ngol mulataa Ngol maayataa Yahunooɓe artii Aan e ko sabbiɗaa? Mayram, yeriima Pullo mo kaanataa Hannde miɗo sawta maa, Miɗo waasa maa Miɗo wulɗa maa E ka hikkorɗaa? Yahunooɓe artii Aan, e ko sabbiɗaa? Ɗemngal toowii dillii Ngal furii pulpule ɗe tuunataa Fuuta majjaa Ko miin majjaa Fuuta Fuuta kam majjataa Aan majjaaɗo Pulaar E leydi Fuuta e ko jumpataa? Giɗo am! yahunooɓe artii Aan e ko sabbiɗaa e ka hikkorɗaa?? www.peeral.com |
Emmba ko eɓɓindiri ƴawgol pelloy fuuta e escaliyeeji Londre!
Taw ko eɓɓindiri jiwun fuuta e manoken Paris!