Assalaamu aleekum wa aleekum ussalaamu wa rahmatu llahi wa barkaatuhu.

Keɗitee haa mi haalana on ko huunyaare waɗdunoo bee fowru.

Nde fowru yiilii baakin balɗe jeegoo jeeɗiɗi pat, weelo naawi[1] ndu, ndu heɓaayi koo[2] ko ndu nyaama. Nden ndu ari ndu fotti bee huunyaare. Ndu ŋati huunyaare kap !

Huunyaare hoosi kosɗe[3] muuɗum nayi bee hoore mum, nastini nder laral[4].

Ndu haɓdi[5], ndu haɓdi, nyiiƴe nastaayi haa laral huunyaare.

Nden ndu ƴeewnii[6] huunyaare: « Ngorgi![7] »

Huunyaare nootii : « Hm. »

– Noye aan innde maa ?

Huunyaare wi: « Innde am miin Maakongoroŋ. »

– Innde maa Maakoŋgoroŋ?

– Ooho.

– E noye ƴakkorto-ɗaa?

Nden huunyaare wi’i  fowru: « To a yiɗi haa ƴakkaa mi kam, sey[8] njahraa[9] mi nder ndiyam mi soofa.[10]

– Yoo, booɗɗum.[11]

Fowru roondii huunyaare, haa yahi maayo, naati maayo haa ɓadii moɗaago (yoolagol), wallini huunyaare.

Huunyaare yinii[12] dilli yahi laartoyi saare[13] mum bee ɓikkon mum warti ɗon (hino) yinoo waɗa kine muuɗum haa kine fowru, tawa fowru ɗon darii.

Fowru ɗon darii haa baakin deydey (tigi-tigi) ko huunyaare soofata.

Nden fowru ƴeewnii huunyaare: « Maakongoroŋ! »

Nde nootii haa yeeso fowru: « Naa’am. »

– A soofaayi naa ?

Nde wi’i  fowru:  « Janngo to a heɓii, taa soofnu. »

Fowru diwi, hippoyii haa nde wolwunoo go (ɗon). Jaka gaɗa ton ndiyam moɗan, ruuyi.

Fowru yahi bujum bujum bujum bujum bujum, wurtii fiɗɗii, wi’i: « Non-non dun’ya.  A haɓɓan gertogal tawtaa poola[14], a haɓɓan ɓotel[15] tawtaa jawgel[16].

Huunyaare daɗi, fowru arti heɓaayi ko nyaama.

www.peeral.com