22/02-2010

En fuɗɗirii innde Allah Huuɓuɗo hinnay Heeriiɗo hinnay. 

Juulde e kisndam wonii dow Nulaaɗo (saw). Ɓaawo ɗum miɗo salmina on.  Miɗo humpita on ko seerenɓe jaabii e ngal lamndal, ngal Saajo Bah mo Peeral.com neldunoo faade e amen ɗoo e nder Ejipte (Misra), nyannde 19/02/2010. Ko nii lamndal ngal ardunoo immorde e makko:

Miɗo jogii ɗoo lamndal diineyankewal, miɗo yiɗi yo on wallu men heen. Kanngal woni: Ka men woni gaa ko leyɗe massihiyankooɓe, ko e ley sari’a maɓɓe men woni, si men faalaama nyamlaade galle, ko maa ɗum rewnee e laawol banki, si rewii ka banki le, feere alaa ko maa koo ko innetee interest (faa’idah/interet) tawee heen. Woɓɓe wi’ii men ɗum ko “ribaa” non, hino harmi. Honno men waɗrata haa men waawa nyamlaade galle? Kori ɗum ɗoo ko e ribaa limetee, walla ko e honɗum?

Ko huunde aaninnde jamaa men on gaa fota. Si on wallitike men heen, men weltoto fota. On jaaraama.

Jaabaandu ndun :

Ɗum ɗoo ko jubbannde (nyoggannde) e fii jaabagol lamndal mon e ko seerenɓe njaabii e maggal.

A- Ɓe mi lamndii hunnduko e hunnduko :

1) Ceerno Doktoor[1] Ahmad Ɗaahaa jannginoowo Fiqhu eɓɓindiraaɗo [2] nder Duɗal Azhar, o wi’i : gollondirde e banki ki ɓeydaari (faa’idah) woodi nder mum alaa ella si tawii o alaa naɓude[3] ɓeydaari ndin.

2) Ceerno Doktoor Mohammad Mohammad Zannaati teegorɗo yeɓre janndeeji alsilaamaaku e aarabuure nder duɗal Azhar [4] jannginoowo firo alqur’aan  e gannde mum, o wi’ii : gollondirde e banki ki ɓeydaari woodi nder mum na dagii si tilsii[5] .

3) Ceerno Doktoor Mohammad Muktar Jum’ah  jannginoowo nder duɗal AZHAR wi’ii : gollondirde e Banki ki ɓeydaari woodi nder mum na dagii wonande ɓillaaɗo si tawii  o heɓaali nokku ngoo.

4) DOKTOOR Sihaabuddiini o wi’i : gollondirde e banki ki ɓeydaari woodi nder mum na dagii wonande ɓillaaɗo, ɓaawo a ɗaɓɓii nokkuuli fuu a heɓaali no waɗaa si wonaa non .                                       

B- Ɓe mi lamndaaki  hunnduko e hunnduko:

5) Ceerno Doktoor Alii Jum’ah  ciftotooɗo (muftii) Ndenndaandi Misra[6] himo dagini  gollondirde e banki ki ɓeydaari woodi nder mum. E naɓude ɓeydaari ndin  o wi’i : ɗum ɗon baasi fuu alaa  e mum .

6) Ceerno Doktoor Muhammad Seyyid Ɗanɗaawii,  seekuujo Azhar on, hino dagini  gollondirde e banki ki ɓeydaari woodi nder mum, no waawi wonirde fuu baasi alaa e  mum [7].

7) Dental wiɗtooji alsilaamaaku nder [8] Azhar siftake (waɗi fatwaa) dagagol   gollondirde e bankiiji ɗi ɓeydaari woodi nder mum ɓe wi’i : ɗum ɗon ella  fuu alaa  e mum .

Kɗl : Aamadu Hasan Boli, Misra.

www.peeral.com