Kɗl: Haliimatu Jallo.

Comci yottiiiɗi no mari nafoore ɗuuɗunde yo banndiraaɓe am juulɓe anniyiiɓe waɗugol comci yottiiɗi. Yo Alla feewn'am feewna on, newinana en laawol moƴƴungol ngol. Comci yottiiɗi ko huunde nde Alla farlli, o yamiri Annabiijo yo o yeeto ɓeynguure makko e sonnaaɓe juulɓe hedditiiɓe fow yo ɓorno.

Allaahu on no daali: "Ko an yo Annabiijo wi'an sonnaaɓe maa ɓen e ɓiɓɓe maa ɓen e sonnaaɓe gondinɓe ɓen yo ɓe jippintin jilbaabuuji maɓɓe ɗin e hoore maɓɓe." Karamokooɓe diina no ƴetti e oo aaya wonndema comci yottiiɗi ko waɗɗiiɗi e dow kala debbo juulɗo.

Alla no daali e yewtere goo kadi: "Si on lamndoto ɓe haaju lamndee ɓe e ɓaawo heedo." Haray comci yottiiɗi ko laɓɓinayɗum sonnaajo ɓay hersa ko ŋari; comci din ko ɗi laaɓal, ko di heedo sabu non ɗi hiway debbo juuldo ƴettuɗo ɗi, ɗi danndete lorra worɓe ɓe tawata hino ka ɓerɗe mum giggol faahisaaku. Alla hino daali :"Ko comci yottiiɗi ɗin waɗata ɓe annditee tawa ɓe lorraaka."

Haray kadi ko ɗi annoora, ko ɗi dewal, ko ɗi ɗoftaare jooma, ko ɗi holluɗi kulol Alla no ka nder ɓernde, ko ɗi jonnituɗi ndimankaaku debbo. Haray banndiraawo, hersa maa kan ko kaŋŋe wonande ma, reenir ka wa ngalu! Ɗii comci kadi ko di danndayɗi ma bakkaatu, ko ɗin comci woni ko sonnaaɓe Annabiijo ƴettunoo waɗi ɓorneteeɗi, hikkii ɗon sonnaaɓe juulɓe ɓen e ɓeynguuli wondiɓɓe Nelaaɗo on, ɓen ɓe tawata ɓe jaɓuno Alla e Nelaaɗo fewndo jamaanu maɓɓe.

Yacco yo sonnaajo juulɗo waɗugol ɗii comci! Si a sikkii ɗii comci ko hayfinɗi ma maa wattitayɗi ma wa kasoojo, min mi wi'ete ngol konngol ko paljol ɓay ɗii comci ɗi hulataa ko teddungal wonande ma! Alla hino daali goy: "Teddungal ko Alla e Nelaaɗo e gooŋɗinɓe ɓen woni ko ɗi heeranii." Ko ɗum waɗi mo no faalaa teddungal o gooŋɗinay Alla o waɗa ko o yamiri e o gooŋɗina Nelaaɗo, o waɗa ko on ɗon kadi yamiri maa waɗi.

Anndu non yo banndiraawo ƴettugol ɗii comci ɗi Alla yamiri kanko e Nelaaɗo makko on hino tawaa e ɗoftaare nde haanu-ɗaa joganaade Joomi maa. Ƴettugol ɗi kadi hino tawnore e ɓen ɓe Alla jantii wondema ko tedduɓe.

Ɓaawo en jantaade nafoore wondunde e ƴettugol comci yottiiɗi, fewjanen non jooni e ko woodani on saliiɗo ƴettugol ɗi. Haray anngal (waasude, soynde) ƴettugol ɗii comci ɗoo ko ko hulɓinii sabu no sabimbina tikkere Alla ɓay anngal ƴettugol ɗi no jeyaa e ko woni saakude oo faahisaaku wi'aaɗo "jinaa". Anngal ƴettugol ɗi hino sabimbina kadi ko worɓe jananɓe ɓen ndaarete kon haa ɓe heɓa bakkatuuji mawɗi saɓu ko ɓe punnoto maa kon. Ko lorra wonande ma sabu non kadi sukaaɓe sifitorɓe loore iimaanu no heewi ka ɓe yani e maa hay si tawii non an ɓernde maa hino woɗɗitii e faale ɗin boneeji.

Mi lamndoo si suka ɗaɓɓoowo rewɓe no darii jokki golle mum; si rewɓe ɗiɗo feƴƴirii ɗon, oya tawa ko sancuɗo darni ɓornii dolokel udditiriingel dow wa laana hara kadi ko hattungel ka wuddu, waɗta ɗon kadi jippuwel ngel hewtataa koppi ɗin, e oya tawa (hara) ko ɓorniiɗo jilbaabu juutuɗo,tiggii haa moƴƴi, ko hommbo e ɓee rewɓe ɗoo ɗiɗo suka on miijotoo yano e mum? Anngal ƴettugol comci timmuɗi no sabimbina kadi lette Alla ɗen.

Alla hino daali: "Ɓen yedduɓe aayaaje amen ɗen, ɓe taƴanoyte comci yiite, juuree ka hoore maɓɓe fatayɗam, ɗum ɗon sumniree ko woni kon ka deedi maɓɓe e guri maɓɓe ɗin. No woodani ɓe ton kadi ɓole njamndi." Nelaaɗo no maaki: "Feddeeji ɗiɗi ko jeyaaɗi e yimɓe yiite ɓe naatataa Aljanna, ɓe heɓataa hay uregol Aljanna. No jeyaa e maɓɓe rewɓe holtuɓe kono hara ko holuɓe, oonyiiɓe, oonyinayɓe, ko'e maɓɓe ɗen no wa'i wa ƴuugeeje gelooɗi.

Oo aaya ɗoo e oo hadiise ɗoo no holli en no woodani on saliiɗo ƴettugol comci timmuɗi lette mawɗe. Haray banndiraawo miɗo rerɗinire e hoore ɓernde laaɓunde fii yo a ƴettu comci timmuɗi, miɗo toroo Alla yo newinane ƴettugol ɗii comci wi'aaɗi timmuɗi, O tabintina en e mum. Aamiina

www.peeral.com