|
Banndiraaɓe tedduɓe, Mino yaafnoo on sanne, gila batu TPW gasi mi heɓaani yaajeende no mbinndir-mi ciimtol batu nguu, waɗi ɗuum ko ɓiyam woni mbo sellaani, ko ɗuum jookimmi tawo, kono he ndaɓɓa, batu nguu waɗii ɓesnoore mawnde, ngam doosɗe laamu Mali ngarii he keewal, yanti heen Hooreejo ngenndi Mali, mo Alla toowni Aamadu Tumaani Tuuree jaɓɓike min to galle laamorde Mali, o anndinii min ko enen he makko ndenndi Tabital Pulaaku, kala ko woni heen sokla men ko sokla makko.
Caggal ɗuum kadi neene TPW woni Aadama Bah Konaaree e joom galle makko Umar Konaaree, ɓe njaɓɓike min to galle maɓɓe, ɓe kollii min teddungal e enɗam Pulaagu, ɓe nganndinii min kala ko njiɗɗen he dow kaɗtanɗe maɓɓe maa ɓe mballu en. Jooni ngarten he batu nguu, ko adii fof, nde jonnde ndee jooɗii, jagge yiilirde nduttii ko he geɗe kawranooɗe yoo mbaɗe, min tawi ko ɓuri heewde he ko hawranoo yoo waɗe waɗaaka, haa teeŋti he piye (kafuuji) ngooroondi kawranooɗe kala ngenndi he Afrik yoo waɗ; 5 000 000 F CFA (miliyonji jowi F CFA), min nduttii he dottugol ɗeen piye ngooroondi no ngasnirtee, min kawri kala ngenndi puɗɗinoondi yoo gaynito, kala ndi fuɗɗaaki yoo waɗ piye mum, enen wonɓe he duunde Orope ɓe pawi he men piye goɗɗe, ɗeen ngoni : € 5 000 catal Almaañ, ngam hooreejo Tabital Pulaaku Winndere yillinoke ɓe, kadi nelaaɗo maɓɓe ina tawtoraa batu nguu, kadi € 5 000 wonande catal Itali, ngam hooreejo Tabital Pulaaku Winndere yillinoke ɓe, o wii : catal Itali no tami terɗe keewɗe baawɗe waɗde ɗee piye, kadi tergal catal Itali yeddaani. €3000 wonande catal ngenndi Faransi, hooreejo catal ngenndi Faransi jaɓii ndeen fawannde. €3000 wonande catal ngenndi Beljik, hooreejo catal ngenndi Beljik jaɓii ndeen fawannde. Ngam enen fof eɗen nganndi so kaalisi (ceede) alaa, eɓɓooje men ko mehre, ɓayri alaa ko waawetee siineede gaa kaalisi, ɗee ɗoo piye fofof kappanaa ko 31/12/2011, ndeke eɗen poti daraade haa ɗe ndañee, ɗe neldee ko adii nguu happu. Caggal ɗuum min kuccani heblanaade batu kuuɓal TPW, ngu nganndu-ɗaa ko he maggu jagge yiilirde TPW mbayletee, min kawri yoo ngu waɗe ñande 28/01/2012, to Bamako laamorgo ngenndi Mali. Caggal ɗuum min ndaari eɓɓooje TPW, min kawri jooɗorde TPW, wonnde he Bamako yoo fuɗɗore, hooreejo TPW wii : o okkiino $20 OOO, ko fuɗɗoree he mahgol ndee jooɗorde, ɗii kaalisiiji ɗoo no jooɗii fodi tan ko Tabital, he ndii mbaadi terɗe koolaaɗe ciinugol golle Tabital Pulaaku Winndere, pawaa yoo mbaɗ eɓɓoore mahgol dunkiire (teeren) TPW, no wa'ata, ɓe njaɓii, ɓe kappanaa ko ñande 31/12/2011. Caggal ɗuum goomu halfinaangu jannde TPW, yamiraa yoo immin he golle goodtidingol caltuɗe Fulɓe, golle maɓɓe kappanaa ko he maayirɗe ndee hitaande nde ngonɗen ndee, nguu goomu ardinaangu ko : Fari Silaata Kah Senegaal e Timoore Culentaa Mali e Iisaa Jallo Burkina e Tijjaani Mbaalo Faransi. Caggal nguu goomu min kawri yoo goomu mawɓe tamɓe humpito sose, ko nguun yottinta pelle winndere daraniiɗe ɗemɗe e pine, goodal TPW. Hooreejo TPW, maa daro haa TPW, yaaja he nokkuuje ɗe Fulɓe ngoni he mum he ndeer ndee winndere, kadi maa o daro haa ɓiɓɓe Fulɓe pamoondira nganndoondira, kadi maa caaktire nanallaaji (kabaruuji) ngimmane ko ɓuri yaawde, mbele pine Fulɓe e ngonka maɓɓe ina anndee he winndere hee piiw (fofof). Banndiraaɓe tedduɓe, ɗee golle, ko golle suudu baaba no waɗɗii kala ɓiɗɗo pullo he yeru mbaawka mum e kaɗtanɗe mum, ngam TPW eewnii ko ngootaangu leñol men pawiingu : ndennden kawren toownen pulaagu, yoo Geno wallu en he kawral e pamoondiral. Banndiraaɓe (sakiraaɓe) tedduɓe, minen on njetta, kala ko humpi on he nguu batu, lamndee min, min laɓɓinana on, on njaaraama. Kɗl : Tijjaani Mbaalo, Hooreejo Tabital Pulaaku Europe, Faransi. www.peeral.com |
