Adobe Flash Player not installed or older than 9.0.115!
Adobe Flash Player not installed or older than 9.0.115!
Adobe Flash Player not installed or older than 9.0.115!
Adobe Flash Player not installed or older than 9.0.115!
Noddaandu faade he annduɓe e alɗuɓe e dawriyankooɓe Fulɓe
Tuesday, 20 December 2011 16:01
Musiɓɓe tedduɓe, hannde en njottike he yonta ka annduɓe e alɗuɓe e dawriyankooɓe men kuccitanta caɗeele ɓiɓɓe leñol men, ngam hannde leñol men, ɓurii tanngeede e yiɗeede, tee annduɓe e alɗuɓe e dawriyankooɓe men piiw (foppet) ina nganndi caɗeele ɓiɓɓe leñol ngol. Ina jeyaa hannde he caɗeele ɓiɓɓe leñol men ɓurɗe mawnude; waasde en jogaade haalirde heeroriinde Fulɓe, mbaaweten hollirde pinal men e magooji kollirooji ngonka renndo men, ɗo ɓe kumpittoo jolooji winndere e nanallaaji (kabruuji) jirlotooɗi he hoɗaango ɓiɓɓe maggol, ɓayri mino anndi alaa ɗo haalirde Fulɓe ñiɓaa he ndeer Afrik, tee enen piiw eɗen nganndi; naalankooɓe (ñeeñɓe) men e magiyankooɓe men ina cokli ɗo cari e ɗo caakti pinal men, he ndii mbaadi kala ganndo leñol men e galo maggol e dawriyanke maggol ina noddaa he ndee hare pineyankoore, tee ina selli eɗen tami dental ganndaangal kuuɓtidinngal (huɓindiingal) Fulɓe, ngaal woni Tabital Pulaaku Winndere, ngal muuyaande mum woni :
1. Momtude humambinnaagu he hoɗo Fulɓe, tawa momtiraa ko janngude e jannginde ɗemngal Fulfulde.
2. Daranaade pinal Fulɓe no wiimtorii e no ŋellitorta he winndere ndee.
3. Yultiindirde pelle Fulɓe daraniiɗe janngude e jannginde ɗemngal Fulfulde e ŋellitde pine Fulɓe e karalle maɓɓe he winndere ndee.
4. Ko nde fedde darantoonde fiyakuuji ɓamtaare leñol Fulɓe he winndere ndee.
Banndiraaɓe, ngaree mballondiren he ittude ndee saɗeende faddiinde wiimtaare pine men, ngaree kadi ngonen tamannde wootere semmbinoore pulaagu e ndimaagu men, ngam eɗen nganndi so kawral alaa keeweendi alaa ko nafata, ɗum noon enen daraniiɓe ngotaangu leñol men, eɗen poti salaade leƴƴinireede kinɗe golle walla seerndireede innde hoɗannde walla toɗireede en jettooje, wota non en mbonnu ko Geno okki en koo, he duunde men Afrik, ngam ɗuum weeɓaani, ko enen tan he leƴƴi Afrik ngoni leñol ngol alaa caɗeele nanoondiral hakkunde maggol, ɓayri pullo mbo fuɗnaange e mo hirnaange ina nantondira, alaa ko haali pullo ñaamo e mo nano.
Sagataaɓe leñol, Fulɓe noddii nootoree enɗam e jinngol leñol, yoo Geno wallu en he waawde waɗde ko addata kawral e ko saasnata ɗemngal men he ndeer ndee winndere. On njettaama.
