Kɗl: Wuuri Jallo, Antwerpen, Beljik.

Fannu iwdi Fulɓe tefirtaake wano iwdi leƴƴi heewuɗi tefirtee non.

Hino tawaa e geɗe ɓurɗe saɗtinde oo fiyaake:

- neesu (nature) eggiyankaagal maɓɓe,

- laawol pulaaku,

- noonee goongaaji taariika,

- e anngal toppitaade ko yowitii e iwdi Fulɓe.

Si ɓadoto nanndude e iwdi Fulɓe sifa, ko iwdi Banii-Israa’iila’en sabu ko kamɓe tan yottii cate 10 nder ɓetirgal ngal cate 15, tawi ɗiya leƴƴi luttuɗi fuu hino jaasi cate 7.

Haaju am ɗoo ko seedee mo janndeeji ADN addi hella ko yowitii e Fulɓe.

Mi yeewtataa saɗteende tabintingol iwdi eggiyankooɓe dumunnaaji, tawde kala kewu (event) walla neɗɗo hino fuɗɗa iwdi e kala nokku e waktu.

Mi tefataa hay fii saɗteende anndinol iwdi leñol siforngol aada, nde leƴƴi heddiiɗi hino sifori miijo, suudu-baaba, ƴiiƴam, maa leydi.

Mi ndaarataa hay heedi-heedaagal (bias) goongaaji taariika, goongaaji heediiɗi e kuuɗe jooɗiiɓe; heediiɗi e janti dahooɓe e feññinooɓe dewe; heediiɗi e firo batteeji ɗi ñolataa; ndeke nguuree pullo heedaaki e gure, fulo wonaa foolo, pulaaku wonaa dewal; ndeke Fulɓe ko ɗaɓɓooɓe battane wonaa ɓe moftooɓe ko battina, wonaa ɓe mahooɓe mahdiiji, ko ɓe maandinooɓe ƴanɗe (ponji), ko ɓe wayluɓe hakkille wonaa ɓe wayluɓe njamɗe.

Mi anndintintaa hay ɗaayre goonginde taariika Fulɓe tawde pulaaku hino toowni jeyal-hoore neɗɗo dow renndo (communitarianism) Fulɓe, tawde pulaaku hino teeŋtini toownude neɗɗo dow piiji, nokkeeli, e waktuuji, wano tawru-ɗen nder taali e needi pulaaku.

Mi tefataa hay anngal toppitaade Fulɓe e heddiiɓe ganndal taariika Fulɓe; hay bone ndee welsindaare e ganndal  e ɓamtaare Fulɓe mi tefataa ɗoo.

Kala faalaaɗo anndude iwdi e taariika Fulɓe himo haani wattande yila e saɗteendeeji limtaaɗi ɗii, o ñaawira hakkil ko Portooɓe winndata, o heɗora teddungal ko mawɓe Fulɓe haalata, o senndindira hooliiɗo e hottiiɗo, o annda ɓee ɗiɗo wonaa gootum faljata. Sabu hino woodi faljuɓe ka faamaa e faljinɓe ka faalaa.  

Ko yowitii e eɓɓindirde e ganndal  iwdi Banii-Israa’iila, mi haaɗtay ka nantingol cate sappo ɗe jantii-mi dow ɗee:

1.    Seedee ADN hino faandii ka iwdi maɓɓe wona ndi Erop e Furnaange-Ɓadiindi (wano ndi Fulɓe woniri Afrik e Ero-Aasi).

2.    Ruttaade maɓɓe to Funnaange-Ɓadiindi caggal duuɓi guluuji (wano Fulɓe ruttori Afrik caggal dumunnaaji)

3.    Mbaadi maɓɓe hino ɓadii ndi Eropnaaɓe edii ndi Funnaange-Ɓadiindi (wano ndi Fulɓe woni noone gooto e nooneeji Afriknaaɓe ɓe hiirnaange)

4.    Dewle e nder musidal tan (wano ka Fulɓe)

5.    Dartaade mutugol nder aadaaji kawte (wano ka Fulɓe)

6.    Maandinireede tawal e diina (wano ka Fulɓe)

7.    Ɗaɗiiɓe e ngaynaaka, catiiɓe e wirniiɗi, tammbitorɓe ngeeygu (wano ka Fulɓe)

8.    Saakitaade e leyɗe (wano ka Fulɓe)

9.    Sabondiral (clannism) ɓurtungal e waasugol laamateeriiji (wano ka Fulɓe)

10.  Serindeede e baŋŋe laamu wano ka Fulɓe (political marginalisation)

Honɗum faameten e janndeeji ADN?

Yo mi fuɗɗor hollitude wondema haa jooni janndeeji ADN feewtude iwdi Fulɓe waɗaaka. Woodi ko janndeeji ngenndiyankeeji e haaliyankooji tawnuɗi Fulɓe. Ɗii ko janndeeji fonndinɗi ɗi fotinaa; ɗum firi ko wano nde leñol kala addata gooto hara leƴƴi goo hino ɓurdi goɗɗi laabi sappo ɗuuɗude. Ndeke Fulɓe fonndaaka, ngenndinaaka, wonaa haaliyankooɓe.

Hattaa njaltudi (results) janndeeji 7 tawnuɗi Fulɓe (ɗi mi huutorta ɗii) anndina fii iwdi Fulɓe; sabu seedee hino tawaa e gooŋɗinal hay si timmaa goonga.

Ka dame hikkiiɗe ɗoo, en suutay ko janndeeji ɗii lasindii fii Fulɓe, fensiten ko ɗum addanta ganndal  iwdi Fulɓe.           

E ko honɗum woni tefooje ADN?

Ko ɗon tokkoytoɗen e winndannde men aroore!