Kɗl: Wuuri Jallo, Antwerpen, Beljik.

D. "The mtDNA of Fulani Nomads and Their Genetic Relationships to Neighboring Sedentary Population" by Cerny et al.

Dewol Fulɓe Woɗaaɓe 186 hoɗuɓe leyɗe tati (Cad, Kamerun, e Burkina) tefaama e oo tasakuyee.

Haplotippuuji ɓurɗi ɗuuɗude (79.6%) e yi’aaɗi ɗin no jeyaa e haploguruppuuji iwɗi Hirnaange Afrik. Ɗii haplotippuuji no fota senditaade e ɓee Fulɓe hay fii hiɓe serti koɗooli. Yoga e haploguruppuuji iwɗi Hirnaange Ero-Aasii (wano J1b, U5, H, e V) yi’aama yeru 8.1%.

Tefoode ‘anthropology’ (anndal neɗɗanke) hollii wondema haploguruppuuji ɗi jeyaaka e leyɗe Ɓaleeɓe ɗen, wonaa nannduɓe e yimɓe hirnaange Ero-Aasii addi ɗi: ko nannduɓe e Fulɓe yi’daa e majje.

Jeydigal ADN yi’aangal hakkunde leƴƴi Ɓaleeɓe (teŋtinii hakkunde Jolfuɓe, Seereraaɓe, Fulɓe, e Seɓɓe Ngaabu) e oo tasakuyee ɗoo hino serti seeɗa e tasakuyeeji ‘polymorphism’ (ceertal mbaadiiji) holluɗi wondema Fulɓe Senegal hino serti e Fulɓe Najeeriya. Ɗin tasakuyeeji ko yimɓe jooɗiiɓe tefaa, wonaa egga-hoɗaaɓe tefaa. Hiɗi holli wondema Fulɓe Senegal ko ɓadiiɓe Jolfuɓe e Seereraaɓe, ko ɓe woɗɗiiɓe Seɓɓe. Hiɗi holli kadi Seɓɓe no jeydi e yimɓe nano Najeeriya (wano Hawsa e Fulɓe). Hakkee ko nanndigal Fulɓe Senegal e Seereraaɓe e Jolfuɓe tiiɗi, ɗii leƴƴi tati no waɗaa e haploguruppu feereejo.

Oo ɗoo tasakuyee hollii wondema dewol Fulɓe woɗaaɓe hino serti fes e dewol Seereraaɓe e Jolfuɓe. Woɗaaɓe hoɗɓe Kamerun, Cad e Burkina ɓen hino gasa ka jeyda dewol e Seɓɓe.

Ko yowitii e miijo wondema Fulɓe ko ka leyɗe daande maayo Niil (Ejipte e Sudaan) iwri, noone fensital gootal goo hollaali jeydal Fulɓe e yimɓe Niil. Kono fensital goo hollii jillondiral Fulɓe e ɓee yimɓe no tiiɗi haa ka wona iwdi Fulɓe hino fuɗiri e yimɓe Niil. Tasakuyeeji ADN hino haani waɗeede, tefayɗi suga yimɓe Niijer e Sudaan, fii yo iwdi egga-hoɗaaɓe Sahel Afrik ɓurte faameede.

Mi ɓeydita miijo am ko faati e oo tasakuyee ɗoo. Wallifiiɓe ɓee yewtaali hay huunde fii yimɓe 20 (yeru 11%) e ɓee Woɗaaɓe. Janndeeji ɗi ndaartu-mi fow tultinaali sifaade haploguruppu maa haplotippu mo neɗɗo gooto tawaa e mum. Hara ko honto ɓee 20 iwri?