Mawɗo jaagorɓe (peremiye misitir) Gine on, kanko woni Jan Mari Doore tuumaama ɗee balɗe ɗoo faaleede memtude doosngal leydi (constitution) ngal, nde o lamndii yo ko ɓuri heewde kon e golle yuɓɓingol woote ɗen itte e tergal wi'eteengal CENI ngal humaaki e laamu ngun, halfinee jaagoral ngardiigu leydi anndiraangal innde faransi raɓɓiɗinaande MATAP.

Ngon tuumo ko e e CNT (Conseil National de Transition), ɗum ko mbatu lomtiingu parluman on, e maanaa ko kanngu feƴƴinta sariyaaji ɗin adal woote parluman keso on waɗeede.

Ko fewndo mbatu ngu aadoraaka (réunion extraordinaire) laatiingu e juma feƴƴuɗo diisondirteeɓe ɓen fow fayda feewtini tuumo ngon e Jan Mari Doore holliti wonde himo anniyii siinyinde persidanjo daawal on, kanko woni Jeneral Sekuba Konaate, eɓɓo dekere semmbinoowo golle MATAP e dow CENI.

E giiɗe diisondirteeɓe ɓen Dore no eɓɓi memtagol doosngal leydi joɗɗinanoongal lewru mee hikka kanyum e sarɗi woote (code électoral). Tippude e ɗen doosɗe ɗiɗi ko CENI on tun fawtii yuɓɓingol woote ɗen, MATAP on halfinaaka hay huunde si wonaa wallitagol mo e baŋŋe teknik on tan. Ɓe wi'i, fewndo ka foolotiral ɗiɗaɓal ngal saatii ɗoo, Doore hino faala juhude persidan on jiiɓa hakkille makko fii juutnugol laamu mum haanungu lannude si woote ɗen timmii.

CNT on wi'i wonde ɓe yiiday e persidan on fii reentingol mo e annuyee bonɗo Doore on. Hino haani kadi annditugol wonde foolondirooɓe ɓen ɗiɗo, ɗum ko Sellu Dalen Jallo mo fedde UFDG e Alfaa Konnde mo fedde RPG hino lurri fota e battane waylitugol baawɗe CENI on. Sellu Dalen hino salii ɗum fes kono Alfaa Konnde kan hino wonani waylital ngal sabu e giiɗe makko CENI on tun waawataa yuɓɓinde woote laaɓuɗe.

E giiɗe Sellu Dalen Jallo e yimɓe mum ɓen, si woote ɗen halfina tergal laamu, ɗe laaɓataa sabu laamu ngun hino heewi jinngande gooto wano ngu woowirnoo gila Alla hinno persidan Lansana Konte. Hiɓe tuumi mawɗo jaagorɓe on hino daranii Alfaa Konnde. Doore yeddii ɗum wi'i himo weldi e kanndidaaɓe ɓen ɗiɗo non ɓe fow hiɓe fotana mo ter, e konngol makko, ko o faalaa kanko ko wuurtugol oonyaare e nguyka woote waɗuooka ka

foolotiral aranal.

www.peeral.com