Banndiraaɓe tedduɓe,

Mino ñaagii kala binndoowo he ɗemngal men Fulfulde, nde etotoo reentaade e konnguɗi janani ñaayooji konnguɗi ɗemngal men, haa teeŋti he konnguɗi jiggaaɗi he ɗemngal Arabeeɓe, ngam so a yi’ii binndoowo no jiggoo konngol jananol, tawata ngool alaa he ɗemngal makko, kono ko nji’at-mi he yoga he binndanɗe, winndooɓe ɓee ina keewi jiggaade konnguɗi Arabyankooji, tawa konngol jiggaangol ngol ina woodi he ɗemngal men, yeru : eɓe keewi huutorde konngol : helmere walla kelme, ngol konngol iwdi mum ko Arabre, ngol firti ko konngol, walla konngol : maanaa, ngol kadi iwdi maggol ko he ɗemngal Arabeeɓe, ngol firti ko : ɓesnoore, walla konngol : sabaabu walla sabu, walla sabuna, ngol kadi iwdi maggol ko he ɗemngal Arabeeɓe, firo maggol he ɗemngal men ko : ngam walla fii walla ɓayri, walla konngol : saanga walla sa’aa walla sa’atu, walla waktu, ngol kadi iwdi maggol ko he ɗemngal Arabeeɓe, firo maggol ko : tuma, walla konngol : walla konngol : fannu, ngol kadi iwdi maggol ko he ɗemngal Arabeeɓe, firo maggol ko : senngo, walla konngol : dowla, ngol kadi iwdi maggol ko he ɗemngal Arabeeɓe, firo maggol ko : ngenndi, walla konngol : diiwaan, ngol kala iwdi maggol ko he ɗemngal Arabeeɓe, firo maggol ko : tunndu walla baalol walla caaɗngol, walla diiwal.

Sagataaɓe leñol, konnguɗi jiggaaɗi he ɗemngal Arabeeɓe ina keewi he ɗemngal men, mino ñaagii en, ngeto-ɗen ɗi reentaade, so en nduttike he ɗemngal Faranseeɓe en, en tawat ko njiggi-ɗen heen ina heewi sanne, tawa ko jiggaa koo ina jogaa he ɗemngal men, yeru : pantalon, woni tuuba walla simiisi, woni wutte, ɗum ɗoo ko yeru tan, kono konnguɗi jiggaaɗi he ɗemɗe janane, ina keewi tef he ɗemngal men.

Mino anndi alaa ɗemngal ngal jiggaaki he ɗemɗe koɗdaaɗe walla he ɗemɗe mbaylaandi, kono woni yiɗde am ko yo en mbaɗtu huwtoraade konnguɗi men, ngam so ɗi momtike tan, en ŋakkorte ko ɗi ndonndinoo he ɓesnoore haala men, kadi ɗuum ustat mbeleendi ɗemngal men e coñceendi maggal, kadi ina faddoo en he wiɗtude.

Mi yettii on sanne.

Kɗl: Tijjaani Mbaalo, Bordoo, Faransi.

www.peeral.com