O wi'i ɓe : (awa maayde nden hino ɓadoraade lam seeɗa seeɗa, kono non mi hulanaa on baasal e annde! Kala ko mi marani on kon e jawle e keyeeji, mi tummbii ɗum e kankiranwal; mi ƴettii ngal mi ubbii e nokkuure e nder ngesa mban.
Si mi maayii yahee ka ngesa, ason cuɓal kala e mabba; haa hawrondiron e kankiranwal ngal, on-say senndon ko woni kon e maggal e hoore fotondiral.
Mawɗo gorko on wowli ɗum tun, o foofi poopaali makko sakkitori ɗin, ɓiɓɓe makko ɓen wattini mo, yimɓe ɓen ari hiwrii ɓe yarlini ɓe. Hooti sukaaɓe ɓen tato sutii ka ngesa; ɓe seeraali hiɓe asa cuɓal kala e ngesa mban haa ɓe wayliti mba fow. Kono e hoore ɗum ɓe ronki yiitude kankiranwal ngal, on-say ɓe fonndi jooni yo ɓe remu mba.
Ɓaawo dabbunde nden fewndike, ɓiɓɓe ɓen haawii fota, nde ɓe tawnoo ngesa mban dimɗinii (rimii) sonyateeri ko mba dimɗinaali yeru mum hay nde wootere; hay ngesa woota kadi e gese kawte (takkiiɗe) ɗen dimɗinaali yeru mabba. Tonngaaki (ɓooyaali) hay seeɗa ɓe faami hagiiga mo ben maɓɓe faandinoo on, hari himo e ndaɗɗudi maayde.
Mawdo on e hakkunde maɓɓe wi'i : “ben men goongii, saanga o yeetinoo en wonnde en heɓtataa ngalu ngun si wonaa tuma waylitu-ɗen tummbere nden fow, kaawee ko fotata wa nguu ngalu, haanungu reeneede, e dankiteede!!!.
