E ko lasindiiɓe ɓurɓe heewde ɓen woni wiide kon, hakkunde ƴamooɓe laamu Gine 24 ko 3 woni yeeso. Ɓen ko: Alfaa Konnde mo heerto (lanndaa) RPG, Sellu Dalen Jallo mo UFDG, Sidiya Tuure mo UFR. E maanaa, ko ɗiɗooɓe ɓurɓe jogaade doole e woote ɗee hakkunde ɓee ɗoo tato pooɗondiroyta si rogere ɗimmere hatonjinaama. Ko janngo juma 2 suliye CENI (ngoomu woote nguu) wi’i lollinay njaltudi woote ɗee nde tawnoo golle limugol ngol lannaali taho. Tippude e njaltudi ndi laawɗinaaka taho, Sellu Dalen Jallo heɓii 39 %, Alfaa Konnde e Sidiya Tuure mo kala 18 %.

Tuma fow timmi hino waawa wonude ka njaltudi ndin wayloo. E bi’ol ngoomu nguu, caɗeele no woodi e baŋŋe aalaaji gollirɗi kanyum e karallaagal ngal. CENI on non feliraama ɗum fota wonaa seeɗa. Ƴamooɓe laamu buy wi’ii wondema nguyka woote waɗii kono lasindiiɓe woote jananɓe ɓee wano Carter Center (Dawlaaji Dentuɗi Amriki) maa nulaaɓe Dental Erop ngal maa Dental Afirik Hiirnaange (CEDEAO/ECOWAS) hino yeddi ɗum. E giiɗe maɓɓe, hay si tawii woote ɗen wonyike e nokkuuli go’o, e ko ɓuri heewde kon ko woote laaɓuɗe, selluɗe.

Hay si tawii ɗuuɗuɓe no sikki woote Gine ɗee ko “woote lenyol“ maa “woote diiwal”, si araama e rogere ɗimmere, haray hino haani ka kanndidaaɓe ɗiɗo luttuɓe ɓee ɓannita leƴƴi ɗi heewaali suɓaade ɓe ka rogere aranere sabu Gine alaa lenyol heɓoowol 50% (hino tuumaa wonde Pullo no yona 40%).

Hino jeyaa e ko saɗtini anndugol ko hommbo e ɓee worɓe tato naatata e galle laamu, taariika ndii leydi: ndii yeɗaaka hay nde wootere woote laaɓuɗe gila jeytal hoore mayri 1958, ko ɗum waɗi hay huunde alaa nde neɗɗo waawata taskitorde. Kala ƴettuɗo laamu ngun hino jooɗii e maggu juudde nguurndam gila Seeku Tuure (1958-1984) haa Lansana Konte (1984-2008). Laamɗo sakkitiiɗo oo Dadis Kamara ko e doole pottiniraa ɓaawo rufugol ƴiiƴam heewɗam nyannde 28 settaambur 2009. Ko barki Alla e tinnaare „wondiigu ɓii-leydiiwu“ (société civile) nguu e nyoƴƴere Faransi e Dawlaaji Dentuɗi (USA) si laamu Dadis raɓɓinɗinaa sabu ko o fonndunooɗo tabitude. Ko ɗum fow addunoo nanondiral Wagadugu ngal sanwiyee 2010 laatinngal laamu luɓal (transition) halfinanoongu yuɓɓingol woote ɓaawo lebbi jeego’o.

www.peeral.com