Kɗl: Algaasimu Monoma Bah, Amerik.

Gineyankooɓe sabbike duuɓi cappanɗe jowi (50) e ko fawi si ɓe newnanaa hikka, nyande 27/06/2010 suɓude laamɗo-leydi keso, lomtotooɗo Jeneral Seekubaa Konaate, toppitiidɗo ardungal leydi ndin gila Muusaa Dadis Kamaraa fellaa.

Woote meeɗiino waɗude Gine, kono ko ɗee ɗoo tun waɗi tawi laamɗo-leydi on tawaaka ka baraa –ko ɗum si denndaangal adunaaru ndun fottani e hikka ko woote laaɓuɗe fokkintinaa. Ɓiɓɓe leydi Gine kala to woniri e adunaaru ndun immori needi, yahi ka cuɓorɗe, suɓori mo faalaa on e hoore neweende, hooti ka mum e hoore weltaare, sabu ko woowaa waɗii.

Ɓaawo ɗum, fennyinaa wonde Sellu Dalen Jallo heɓii 44%, Alfaa Konde 18%, Sidiya Tuuree 13%, Lansana Kuyate 7%, Papa Koli Kuruma 5%, ekn. Tawde non sariya kan hino wii si hay gooto e kanndidaaɓe ɓen heɓaali 50%, ko ɗiɗo ɓurɓe ɓen toɓɓe yahata ka rogere ɗiɗaɓere, Sellu e Alfaa feƴƴi.

Gila ɗoo, ɗii ga'i ɗiɗi immii cippiro gaynitoro ngon. Ɓe fuɗɗiri toraade kanndidaaɓe pottinaaɓe ɓen yo ɓe tawtu ɓe. Diisondire toppitoraa kene e gunndol, haa Alfaa Konde waawi heɓude feddeeji 15, kono tawi ɓuurɗi ɗin heewaa fiira, sabu si hawtitaama, ɗi fow ɗi heɓataa toɓɓe 5 ka woote. Kono, haɗaali fedde Alfaa nden weltori fota, ɓe yaltini ɗum ka kene, ɓe waɗi ɗum seedee Gine ko kanko ɓuri yiɗude. Kono ka gunndol, tawi hiɓe naadude juuɗe e koyɗe, kanko e fedde Sellu nden fii heɓugol ballal Sidiya Tuuree e Lansana Kuyaate, e Papa Koli Kurumaa. Laatii Alfaa heɓii ballal Papa Koli.

E nder balɗe seeɗa, Sellu heɓi ballal fedde Abubakar Sompare, o ɓeydi ɗon Abe Sillaa, kanyum e ɓuraaɗo ƴameede on, Sidya Tuuree. Gila ɗoo, tawi nguurndam politik Alfaa Konde woɗɗike. Gila ɗoo, tawi rawaandu e ullundu (bare e nyaari) weddodii ka faaɗi. Gila ɗoo, tawi e gite Alfaa Konde e iwtirɓe ɓaawo makko ɓen, halfinaaɓe woote ɗen fow ko Sellu wonani. Gila ɗoo, tawi nyorunooɗo tuuba fii cippiro ngon wi'ii "boote tawaaka".

Ka sariya, woote sakkitore ɗen hino foti waɗude balɗe 14 ɓaawo woote arane ɗen, kono, immorde e ellaaji seeɗaaji ka woote arane, e tawde Alfaa Konde hino tamƴinii o alaa reweteengal laaɓungal fii foolugol, o addi ngantooji heewuɗi fii yo woote ɗen dirne. Tawi ko nyande 08/08/2010 haanunoo wooteede, dirnaa haa e 14/08/2010. Ɗum ɗoo kadi tawi hawranaali mo, halfinaaɓe fii woote ɗen toɗɗii kadi nyande 22, o wii ɗon kadi hawranaali mo -o wii kanko ko maa ka timmoode lewru 9-ɓuru.

Jooni non, feenyii himo mari ballo, on non ko Jan Mari Doree, hooreejo ɗowgu (government) ngun. Moodi Dooree hollii himo faalaa yo woote ɗen dirne haa faljereeji arani ɗin fow faljitee, sabu, e bi’ol makko, si ɗum waɗaali, himo huli ta sifa ko waɗi kon Kenya waɗu Gine. Ɗum ɗon welaali yimɓe Gine ɓen few, sabu golle woote wonaa golle makko. Halfinaaɓe golle ɗen wii, woote ɗen hino waawi laataade nyalnde 22/08/2010 e hoore neweende, ɓe hollitii ɗum nyaawirde Gine mawnde nden. Sellu Dalen kadi wii himo heblii fii mum, o wii  kadi o waɗay  kala ko sariya kan newni fii-yo (ngam) woote ɗen laatoo nden nyannde.

Blaise Kompaore, laamdo-leydi Burkina Faso mo dental hirnaange Afrik (CEDEAO/ECOWAS) hikkini yeeso fii hoynugol muraadu ndun Gine arii Konaakiri nyande 03/08/2010. O diisodii e denndaangal laamateeri Gine ndin, immorde e Jeneral Konate, naɓi e Jan Mari Dooree, haa e Hajja Rabiyatu Sira Jallo. Ɓaawo ɗum, o diisodi e sendikaa en, e 24 darinooɓe fii laamu ɓe feƴƴaali 6en, haa e Alfaa Konde kanyum e Sellu Dalen Jallo. O holli weltaare makko e golle waɗaaɗe ɗen. O weltanii Jeneral Sekuba, Jean Mari, Haja Rabi e kala tawaaɓe e laatingol woote ɗen e hoore neweende. O holli kadi, woote ɗen hino foti waɗude kisan, sabu si wonaa dum, ellaaji ɓurɗi fewndiiɗi ɗin hino waawi suppitaade, ɗum le, o wii, wonaa e sago hay gooto e yiɓɓe Gine.

Hannde, Ginenyankooɓe nder e yaasi hino tuɗi noppi hino hiɗitoo radiyooji nodda talifonji, hino udditi gite hino ndaara teleeji yeeɓa jaayndeeji, hino faɗi ɗaanaade sabu kulol wota 28/o9/2009 waɗtu, sabu ndee hoccannde ɗoo hino "hoccii kono cikkaaki" !!!  www.peeral.com