|
Banndiraaɓe tedduɓe, Gila ndee yontere ɗoo, si Alla jaɓii Peeral addanay en callalal binndanɗe ko yowitii e Iwdi Fulɓe. Ɗee binndanɗe ko immorde e Wuuri Jallo, ganndo toowɗo mo yimɓe seeɗaaɓe anndi ko kanyum wonnoo sabu sinceede catal Tabital Pulaaku e nder Beljik. O wuurdii e Fulɓe ɗuuɗuɓe hono Fulɓe Woɗaaɓe e nder Nijeer. Ɓeyden ɗon wonde Wuuri Jallo ko fagguduyanke diisondirteeɗo winndereyankeejo, ko ɗum waɗi wota hay huunde juhu on yeeso, si on aroyii yiide ɗoo binndanɗe yowitiiɗe e faggudu, fannu mo Peeral ŋakkiraa sanne binndanɗe e muuɗum, kono jooni ko yettude Alla, en heɓii neɗɗo waawuɗo uddande en nden yolnde.
Wota on aamu addude miijooji mon, lamnde mon, e giiɗe mon ko yowitii e binndanɗe yaltooje e Peeral ɗen fuu. Men humindiray on e winndooɓe ɓen tawa on waaway lamndaade ɓe tiinde e taasannde kala ko faalaɗon, wonaa haa men wona hakkunde mon e maɓɓe, wano woniri non miijooji e tiwooriiji holliteteeɗi e binndanɗe saakiteteeɗe e lowre Peeral, ko waɗɗiinde winndooɓe ɓee tan, ɗin miijooji e tiwooriiji wonaa tuma kala yahdata e miijooji Peeral. Kono hiɗon anndi Peeral ko Regorde meeɗen, to fotteten en fow yeewten, jaaɓondiren miijooji e dow wellitaare yaajunde wonande gooto kala. On toraama taweede e yeewtereeji Peeral fuu, wano anndirɗon non wonde ɗee golle ko kafuuji men enen fuu. Pellet on yi’iino kadi wonde en heɓii winndooɓe jooɗiiɓe Najeeriya, ko ɓen woni Ya’u Siuto jooɗiiɗo Aadamawa, golloowo Rajoo Gootel, e Kasim Bashir Umar, jooɗiiɗo Abuja heerorɗo jokkondiral (communication). Wonaa le wonde en yejjitii Ibraahiima Lom Jallo, Toppitiiɗo Peeral on e nder leydi Espaany, pellet binndanɗe makko hino heewi e Peeral jooni. Kamɓe fuu ɓe jaaraama, ɓe jaɓɓaama, pellet ɓe hollii en wonde koo ko jokkuɗen ɗoo ko donngal men enen fuu. Peeral na hofna gooto kala e maɓɓe to woniri, Peeral hino yetta gooto kala e janngooɓe meeɗen, e hoore winndooɓe toppitiiɓe Peeral ɓen gila ndee lowre sincaa e 2008 yejjitaaka, sabu ko binndanɗe maɓɓe kelɗuɗe ɗen waɗi haajooni golle meeɗen na wuuri, ko non kadi haralleeɓe men ɓen, toppitiiɓe kisal lowre nden to baŋŋe karallaagal. On yettaama masinta. Ngardiigu Peeral Saajo Bah www.peeral.com |
on jaaraama
Si Alla jaɓii en fuɗɗoray tefude iwdi Fulɓe ka janndeeji ADN, hikkinen ɗon binndi taariika e taali Pulaaku. Moni kala toraama wallitorde miijo e ganndal mum, Alla ɓeydana en ganndal.
Wano moodi Malal maakiri ni, wano yimɓe buy majjiri e ganndal iwdi Fulɓe, ko wano non yimɓe buy majjiri e ganndal Faggudu. Hay laamiiɓe leydi Amerik (hay lamminaaɓe bankiiji), no jokki jikku e sikke.
Fannu faggudu hino yaaji waɗi calɗi, hino towondiri sanne. Kono en ronnkataa ka fuɗɗoren. Mo kala no waawi addudi lamndal faatiingal e faggudu, ɗaɓɓen jaabawol mum. Min mi suɓike winndugol ko haɗi yimɓe aduna fow waawali haajooni heɓude ngalu.