E innde Tabital Pulaaku Beljik, Ibraahiima Timmbo wi’ii ko adii fof, himo yetta Geno Joom baawɗe nde O laatinani en Koolol Fulɓe 1ɓol waɗungol rowani ngol e 07-07-07, O laatinani en hikka kadi Koolol Fulɓe 2ɓol waɗungol e 15 & 16 lewru juko (uksatu), Alla waɗi ɗiɗi ɗii kala laatii e dow maloore, jam e kisal, e tawtoreede yiɗuɓe pulaaku buy, fulɓe e ɓe wonaa fulɓe.

Refti o wi’i: “Mi yettii denndaangal fulɓe wonuɓe ɗoo e Beljik, dariiɓe dadii haa yoori ken, walli haa golle njuɓɓudi kooli ɗin ɗiɗi non timminaa e dow welolwelo, weltaare, enɗotiral, wallindiral e dow laaɓotiral.” Himo heertinana weltaare Ginenaaɓe, Muritaninaaɓe, Senegaalnaaɓe, Kamarunaaɓe, Burkinaaɓe, Malinaaɓe, Liyonaaɓe e kala holluɗo wonde ƴiiƴam pulaaku, kiram e korsa leñol hino doga e ɗaɗi muuɗum.

O wi’i fahin: “Mi yejjitaali dee laamu Beljik nguu e darnde maggu haa eɓɓoore Tabital Pulaaku Beljik nden laatii no newori, e ɗii kooli ɗoo fow, teeŋtii non koolol 2ɓol ngol. Mi weltanike ngenndi Beljik ndin e balle mum ɗen no ɗe waawi siforeede fof.

“Mi weltanike mi yettii peŋɗe e seteeɓe seeniiɓe, immoriiɓe Senegaal, Caadi, Burkina Faso, Gine, immoriiɓe Dowlaaji Rennduɗi Amerika, Faransi, Itali, Holannda, Almaanya, Espaanya, Portokeesi, Britani Mawndi e kala immoriiɗo to woɗɗi walla to ɓadii, ngam ara tawtoreede ngol koolol, fulfɓe e ɓe wonaa fulɓe.

“Mi heɓii seyo mawngo, woni weltaare mawnde e kawtite fulɓe nootiiɓe men, nootori giɗgol e laaɓal ɓernde, woni ko ɗe cate Tabital Pulaaku Winndere walla ɗe wonaa ɗum, mi yettii ɗe denndaangal, ko aldaa e keerol.

“Mi weltanike annduɓe men seeniiɓe walliri gannde mumen tedduɗe, ɓe yankinii e golle ɗee, ɓe gollidi e annduɓe men wonɓe ɗoo. Mi heertinana weltaare am Dr. Hamme Watt, Dr. Iisaa Jallo, Sonna Hinndu Umaru, mi heertinanii ɓe foppet jaaroore immoriinde e danka ɓernde am. Mi yejjitaali ɗoo Dr. Daawuuda Jah, gooto e annduɓe men wiɗtoowo ɗoo e Beljik, dariiɗo ardii jeewte batu ngun, yiili ɗum haa timmi, refti o darii kadi e yiilugol jonndeeji  (ataliyeeji) fiɓaaɗi ɗin foppet, haa no ɗi hommbiraa non e hoore jam e moƴƴere. Mi yettii mo mi weltanike mo, kanko e kala wallidiiɓe makko, mi yettii ɓe sanne. Awa, jannguɓe men yiɗi senndodaade gannde mumen e renndooji men, ɓe fof ɓe jaaraama fota, ko aldaa e keerol.”

O ɓeydi wonde : “No gasa e nder mooɓotiral men ngal, e nder ɗen balɗe ɗiɗi weltinooje, malla ko adii ɗe yottaade, maaɗum ɓaawo ɗe feƴƴude, no waawi wonde men weltinaali woɗɓe no ɓe haaniri weltinireede non, walla men buɓɓike e nder golle amen ɗen yoga e yimɓe tawtoraaɓe, maaɗum men mettinanii yoga e woɗɓe hara men anndaali, men tewaaki. Awa kala mo men falji e muuɗum, walla ko men falji e mum, mi torike on yaafuyee e innde Tabital Pulaaku Beljik. Kadi, kala ko men falji e golle gollaaɗe ɗee hedde yuɓɓingol koolol no ngol, no ngol diidori non, men torike on sellinangol en, sabu golle ɗee fof ko kafuuji meeɗen, en ɓurdaali heen hay seeɗa.”

Ɓaawo hollude weltaare makko o wi’i : “Jooni non fiikala (hay so tawii) ko catal Tabital Pulaaku Beljik woni ko yuɓɓini ɗii kooli ɗiɗi kala, fiikala ko Tabital Pulaaku Beljik darii darodi e fulɓe wonuɓe Beljik haa njuɓɓudi majji laatii, jojjinaa e nder ɗii duuɓi ɗoo ɗiɗi non, ɓe darori kaalisi maɓɓe e lakkere maɓɓe tawtude ballal ngenndi Beljik, haa ko gollaa heen koo gollaa haa  timmi, awa yo gooto fow anndu wonde, ko gollaa kon fofof, ko e innde fulɓe foppet gollaa, hay so tawii ko Tabital Pulaaku Beljik hikkanii en yeeso.

“Eɓɓooji lelnaaɗi ɗii, woni fotnugol Fulfulde, ɓamtaare rewɓe, straatijii wiltino-jawdi, fampagol rajoo Fulfulde e ceekol (kanal) Fulfulde, ɗii ɗoo eɓɓooji (projeeji) fofof ko kafuuji meeɗen enen fulɓe denndaagal. Wota on accir Tabital Pulaaku Beljik tun ɗii eɓɓooji, enen fof daroɗen e hoore wallindiral e laaɓondiral, gooto kala wallira ittiri mbaawdi muuɗum, no jojjiniren faandaare men nden, sabuna ko si gooto e men kala ronndike seeɗa e donngal ngal, si ngal hayfana en ngal hoya, ngal newoo ronndaade e hoore doy.”

O inni : “E innde Tabital Pulaaku Beljik, miɗo weltanoo ɗoo mawɓe amen jaɓuɓe darodaade e sukaaɓe mumen e ɗee golle, semmbina ɓe haa ñalnde ɗe hurmunoo, miɗo heertinana Alhajji Sanusi, Alhajji Abuubakar Leelumaa, Mawɗo Jinnji, Alhajji Mammadu Alfaa (Alhajji Chemie), miɗo heertinana ɓe foppete weltaare amen nde aldaa e keerol.

“Yettoore e weltaare amen timmataano, si  mi rawnoraaki heertinande Hooreejo Tabital Pulaaku Winndere, Alhajji Alfaa Aamadu Jallo, sabu darnde makko nde o daranii leñol ngol, gila ko neeɓi, ko adii o ardaade ngal kawtital fulɓe teddungal, woni Tabital Pulaaku Winndere. Awa on fow on weltanaama, on yettaama sanne.”

Yo Geno reenu ayna, daɗnda fulɓe, Fulfulde e Pulaaku, ɓeydana en fiira e feere haa cay.

Kuɗol : Saajo Bah (ndee winndannde winndaama e yamiroore Ibraahiima Timmbo, Hooreejo Tabital Pulaaku Beljik, ñalnde 06-09-08, to galle makko Briksel).

jaayndepeeral@gmail.com