17/12/2009

Haa jooni konu Gine ngun hino jokki fellugol ɓiɓɓe leydi ɓe wi’aali waɗaali hay huunde ɓe lamndaaki hay huunde si wonaa wuurugol e deeƴere e ɓuuɓtu-ɓernde.

E tenen feƴƴuɗo, kure miniteeriiɓe CNDD ɗen ko e suka mo duuɓi 20 hawri e mum: Mustafaa Jallo, janngoowo jaaɓi-haaɗtirde, iwdi Gonngoore-Pita, mo Alahajji Abdullaahi Paate e Binta Jallo. Tawi himo ka ɗatal Le Prince, kartiyee Bammbeto, Konaakiri. Mustafaa ko ɓiɗɗo bajjo mawɓe muuɗum.

Hara oo ɗoo war-hoore kadi ko nii luttirta, wano war-hooreeji 2006, 2007 e hikka 2009?

Ɗii war-hooreeji ɗi alaa accude Gine ko seedee wonde jamaa Gine on hino hatonjini e ballal konu winndereyankeewu sabu miniteeriiɓe Gine ɓen hino wa’i hannde wa dawaaɗi feetuɗi accitaaɗi e yimɓe ɓen. Danndoowo alaa, ka wullitee alaa sabu hiɓe felliti sariyaaji ɗin wonaa kanɓe waɗanaa! Gila non ɓe fuɗɗii nyaamindirde hakkunde maɓɓe (gila Dadii Kamaraa fellaa e hoore ɗum ko nyannde 3 bowte (deesaambur), ɓe wa’iino wa yilmunge e hoore. Feewndo hannde yimɓe heewɓe hino fawi jikke e jooɗiiɗo on kenenti e jullere Dadii nden, Jeneral Seekubaa Konaate kono on tama’u nanndaa e tuugiiɗo e hoore ko kelɗi sabu haa hannde Konaate anndiraaka konngol maa kuugal lunndiingal yahdiiɗo makko on Dadii. E piide misal, ko kanko waɗti Muusaa Keytaa e Idiriisa Sherif ardiiɓe peŋgal (delegasiyon) CNDD imminaangal fii yeewtereeji Wagadugu ɗin. Ko ɓen ɗiɗo le anndiraa wonde fantinooɓe ɓen e nder CNDD. Ko adii, wi’ano ɓe ittaama e muraadu ndun.

Fannaamaa konu Gine ngun hino siŋori wa kootii e laamu ngun, ndin leydi ɓuuɓtintaa. E hino le ko doole tun waawi ɓe ittude ɗon. Dental leyɗe winndere nden ko etii woo ko etii, maa ngal ndaarana ittugol konu hay si ko e leyɗe CEDEAO / ECOWAS ɗen, ko yaha faaboo jamaa Gine on.

Kɗl: Umar Bah, Otriis.

www.peeral.com