Adobe Flash Player not installed or older than 9.0.115!
Adobe Flash Player not installed or older than 9.0.115!
Adobe Flash Player not installed or older than 9.0.115!
Adobe Flash Player not installed or older than 9.0.115!
Gine: Dadii tuumaama war-hoore feewde neɗɗaaku
22/12/2009
Tippude e ko jaayndeeji wano Le Monde maa Jeune Afrique winndi kon hannde, ciimtol Ngoomu Tasakuyeeji ngu Fedde Ngenndiije Dentuɗe (UNO / ONU) sincunoo ngun tuumii hooreejo CNDD on, Muusaa Dadii Kamaraa war-hoore feewde neɗɗaaku (crimes contre l’humanité) e battane warngo nyannde 28 siilto ngon. Ciimtol ngol waɗtanooma e sookeeje hooreejo UNO / ONU on kanyumma e feddeeji leyɗeele wano Dental Afirik e Dental Erop kono haa jooni ngol saakitaaka.
Hooreeɓe CNDD tuumaaɓe go’o kadi ko: Jean Claude Pivi ministirjo (jaagorɗo) ndeenaagu persidan on, Ceeboro Kamaraa, ministirjo halfinaaɗo haɓugol ngeeygu doroogu e banndiyaagal, Buubakar Sidiki Jakitee “Tummba” ballo persidan on, felluɗo mo e hoore nyannde 3 bowte; gila on tuma Dadii hino naɓaa nyawndagol Marok hay huunde laaɓaali tawo e ko yowitii e cellal makko si wonaa penaale ɗuuɗuɗe, e yeddotire e ŋuno.
E konngol ciimtol ngol: “daliilaaji yonuɗi hino woodi goonginɗi waɗɗiinde (responsabilité) Dadii e nder war-hooreeji e doolugol rewɓe nyannde 28 siilto.” Ngoomu tasakuyeeji UNO / ONU ngun yamirii yo Nyaawirde Lorliyankeere Hakkunde-leyɗeere nden (Tribunal Pénal International / International Criminal Court) ɗaɓɓire noddugol sariya e Dadii kanyum e hooreeɓe limtaaɓe ɓen.
Fahin ciimtol ngol teeŋtinii wonde masiibooji hulɓiniiɗi feƴƴuɗi ɗin nden nyannde ka estaadi 28 Siilto wonaa arduɗi kawral wano no ɗum waawiri laataade kala ka koneeli yimɓe tummbondiri, ko eɓɓanaaɗi huuwaa e dow tewaare.
Tippude e jaaynde Jeune Afrique, ciimtol ngol sellinii wonde yoga e masiibooji ɗin ko lenyol gootol faandinoo (ko ɗum woni Fulɓe).
Jooni non hay gooto anndaa si Dadii’en naɓete La Haye sabu ko maa Ngoomu Kisal (Conseil de Sécurité / Security Counsel) ngun fewjana ɗum, e hino le leyɗe ɗiɗi tawaaɗe e ngun ngoomu, Ciin e Riisi hino weldi e laamu Gine ngun. Hino gasa ka Nyaawirde Lorliyankeere nden tigi ƴettana hoore mum feere noddugol sariya e Dadii’en wano nde waɗirnoo non e hoore laamɗo Suudan Omar El Bashir sabu war-lenyol Darfuur ngol.
