|
06/012010 Liyonaajo arano on e toɗɗeede wonugol Freeholder nder Dowlaaji Ndennduɗi (US), waɗii woondoore mum fii ƴettugol gollal makko ngal. Mohamed S. Jalloh mo Roselle nder dowla New Jersey, hino gasa tawa ko kanko woni ɓurɗo famɗude duuɓi mo iwdi Afrika woondinaaɗo e nder wootere e gollirɗe burɗe toowude e nder US, ɓaawo Persidan Barack Obama, fewndo ɗoo ko o laabiyanke (lawyer) tiiɗɗo, daraniiɗo semmbinde jannde.
Himo jokki ngal cemmbinal makko yowitiingal e jannde ka o jannginta ɗon, sabu ko kanko woni ballitoowo Profesoor ka Jaaɓi-haaɗtirde Kean (Kean University), himo janngina ɗon kaaldal (negotiation), debaa e laabi jokkondire (Communications law).  Toppitiiɗo Kumpital on ka Ambasaad Sarlon, Riyadh, woni Alhaji Jalloh, fewndo o wonnoo US, o ommbiino coftale Mohamed S. Jalloh ɗuuɗɗe. E nder jiidal goo ngal ɓe waɗidi kanɓe ɗiɗo rowani, Freeholder suɓaaɗo on wiino: “Si mi suɓaama wonugol Union County Freeholder, mi jokkay e wakkilagol fii semmbino pehe janndeyankooje, mi hisina yimɓe Union County ɓen. Miɗo gomɗini gollugol tabintina ko yeɗɗi e nder laamu tawa kadi miɗo toppitii gollal mawngal faade e renndo ngon, ngoon renndo ngo fonnaaka e hay huunde. Ko ɓeydii ɗon, mi huuwtoray mbaawdi am laabiyankeeri ndin kam e faamu am ngun haa mi nawra yeeso weeyo faggudu ndun, mi reena hitteendi nguurndam ɗam wonande hoɗiyankooɓe (residents) ɓen e biisineesiiji Union County ɗin.” Awa, seeɗa nii ko adii Bernice Martina Jalloh ɗowude woondoore ɓiɗɗo mum on, baaba mum Mohamed S. Jalloh, inneteeɗo Abdullaay Ben Jallo, o jonniino daartol nguurndam ɓiɗɗo maɓɓe on wano lelori ley ɗoo nii. Nguurndam Mohamed S. Jalloh Freeholder, Mohamed S. Jalloh ko Laabiyanke hoɗuɗo nder Borough mo Roselle. Ko o jibinannde Union County, o janngii e Newark Boys Choir School kam e janngirde Middle School nde Saint Elizabeth nder Linden, ɓaawo ɗum o ɓaaroyi jannde makko e janngirde inneteende Roselle Catholic High School. O heɓiino darnde Baceloor Siyansi (Bachelor of Science degree) ko yowitii e Rhetoric & Communication (Payka e Jokkondiral) wondude e pamarel (minor) e Janndeeji Afrik-Amerikyankooji immorde e Jaaɓi-haaɗtirde Syracuse (Syracuse University). Ɓaawo Syracuse, o janngoyi to Janngirde Laabi nde Jaaɓi-haaɗtirde Rutgers (Rutgers University Law School) nder Newark, o heɓi toon darnde makko Jurist Doctor.  Tuma kala ko o tergal softungal e nder renndo makko ngon, Freeholder Jalloh gollii hono Ɗowoowo Tenth Leadership Institute nder Syracuse, o woniino lomtaniiɗo janngooɓe to Syracuse University Quality Council, ko o tergal sincungal African American Male Congress Honors Society. Nder Rutgers, o laatino tergal Student Bar Association, o golli wa lomtaniiɗo janngooɓe ɓen to Curriculum Committee, kadi o woniino tergal e Association of Black Law Students kam e Association of Latin American Students.
Freeholder Jallo gollanii njuɓɓudiiji Northwest Jersey kam e Essex Newark en kala, ko ɗon o heɓi ɓurdal (priviledge) lomatanagol teelɗuɓe famɗa-peheeɓe e fiyakuuji yowitiiɗi e laabi ɓeynguure (family law), e soodoowo (consumer) e laabi hoɗnugol e fitina (violence) nder galle. O glliino kadi wa ballitoowo Diisndeteeɗo County on ka County of Union, tawi himo toppitii, ko ɓuri kon, ko yowitii e piɓondiral (contract). Iwdi natal ngal: Ko immorde e Jim Lowney mo Union County e Alhajji Jalloh, Riyadh, Sawdi Arabiya. Kɗl: Saajo Bah, Nederland. www.peeral.com |
