13/01/2010
Dadis Kamara hewtii (yottike) ka erepooru militeer Wagadugu e njamndi 22:00, njamndi Burkina Faso, himo ɓornii comci siwil fawi ɗon manton. Awiyon mo o ari e mum on, ko to erepooru militeer Wagadugu jippii. Fewndo o jippotoo ɓorɗi ɗin tawi yimɓe ɗiɗo hino wallude mo, ko balaaje maɓɓe ɗen o wallitori fii hewtoygol ka weerde makko VIP.
Tippude e jaaynde Kibarou nden, diɗɗal ngal yimɓe tato maa nayo arii yettugol mo. Hooreejo CNDD on naɓaama e galle wilaa nder Wagadugu. Si tawii ko ko yowitii e cellal makko ngal, haa jooni Dadis waawaali daraade e koyɗe makko ɗen malla o yeewta goɗɗum.

Nder Konaakiri, Kibarou wi’i fahin wonde, dillere nde peŋgal CNDD manngal yahay Wagadugu janngo 13 nduu lewru siilo fewndiindu, e dow ardagol Jeneral Seekuba Konaatee, hooloraaɗo CNDD arano on, feewnde ɗoo.