|
16/01/2010 Gine ko moosa wewla kaa ko homoo heɗitoo fewndii. Ko honmbo anndunoo e nder ɗii njamndiiji sakkitiiɗi ɗoo fiyaake politiki Gine nanngayno ngal selirgal wano waɗiri nii? Hanki e juma 15 siilo (samwiyee) ka kiikiiɗe ɗoo Dadis Kamara hooreejo CNDD, Jeneral Seekubaa Konatee, jaagaro ndeenaagu ngenndi, laamɗo lomto Dadis ka laamu happaangu gila oon fella e hoore naɓaa Marok e Blees Kompawore laamɗo leydi Burkina Faso halfinaaɗo mediyasiyon galdigal leydi Gine, ɓee tato siifii nanondiral waawngal wallude haa Gine yalta e ngal galdigal ko leydi ndin woni e mu’un gila duuɓi.
 Ngal nanondiral yowitiingal e fiyaake Gine mo jamaa on diisaaka hollitaaka, waɗii yaasi Gine; tawi kadi tergal Doole Wuurɗe (Forces Vives), leydi ndin hay gooto ɓadnaaka, fewjinaaka. E nga’al kadi ko ko fewjaa haa timmi ɓe tuɗanaa, ko ɓe waawi woo ko jaɓugol. Yo lunndiyanko en woncitu non dey si ukkoo, wota tawu hara ko janforka.
No tawaa e toɓɓe fottaaɗe e mum: -Heddagol Dadis Wagadugu haa o ɓurora cellal… -Konaate ɗowa yolnde wonnde hakkunde nden … -Joɗɗingol diiso ngenndiiwo sar’iyankeewo ngo 101 neɗɗo… -Suɓagol Hooreejo Jaagorɗe iwɗo e Doole Wuurɗe … -Siinugol woote e nder lebbi jeego’o tawa gooto e CNDD, malla tergal mum, e kala tawaaɗo e guwernemaa makko, malla koninke wonɗo e sarwiise hay gooto e ɓeen tawetaake ka ɗaɓɓere laamu… Fii kala ɗuuɗuɓe wewlirii ndii aadi hannde, kono mo yurnitike tinay niɓoy e nder ɗee toɓɓe siifaaɗe; wano ka wi’aa ɗon ko koninke wonɗo e serwiise woni tawetaake. Kori ɓe wi’oytaa en Dadis wonaa koninkeejo wonɗo e serwiisi mo tawaaka e CNDD? Bumɗo ko heɗiiɗum. Fow hino anndi Ginenaaɓe ko boopalle e ɓii mum ɓe woowi. Yo tawu dey hara ɗum fow haaɗii ɗoo. Yaakaare e tama’u yo lomto maapaare e suno, poomaa. Kɗl: Tijjaani Bari, Paris, Faransi. Iwdi natal: Guinéenews.org www.peeral.com |
