17/01/2010

Nde wonnoo Dadis Kamara ko bewre ɓurani mo ndimaagu makko ngun, o wowluno ko moƴƴi  kono o huuɓnaali aadi. Jooni ɓayri feere alaa, hiɓe faalaa huuɓninkinaade ko ɓe fodunoo kon; ɓe wii jooni ɓe newnii  yo laamu ngun ɓadto siwil on,  yo Doole Wuuruɗe (Forces Vives) suɓo wonayɗo Hooreejo Jaagorɓe (peremiyee miniisir), Doole ɗen tummbondirii, ɓe suɓike ɗiɗo, ɓen ko Jan Mari Dooree  mo lunndaare (opsisiyon) nden suɓii on, e Hajja Raabiyatu Sira Jallo, mo senndikaaɓe ɓen e sosiyetee siwil suɓii on.  Kanɓe ɗiɗo non ɓe ɓorotono Gine hannde yahugol Burkina Faso fii faamondiroygol e Jeneral Seekuba Konaatee, e Dadis Kamara, e Belees Kompawore, kono laataaki...

Kala suɓaaɗo ardagol ngal daawal (transisiyon) hino haani anndugol wonde o yaltoytaa kanndidaa wonande jullere laamu nden, kadi e nder lebbi 6 woote ɗen yuɓɓinee, tawa hay gooto e feddeeɓe CNDD ɓen yaltoytaa fii laamu ngun.

Cerno Bookara Bah mo Pulaar.org winndiino toɓɓe nanondiral ngal e fulfulde wano ardata ley ɗoo nii:

1. Ɗooftagol wellitaare renndo haa arti noon e wellitaare jaaynirɗe (press) e miijo ;
2. Gaddagol kisal yimɓe e jawdeele ;
3. Juɓɓitingol e mahitagol Doole konu e kisal ;
4. Cosgol (sincugol) Diiso ngenndiiwo e daawal (CNT : Conseil National de Transition), njuɓɓudi politik mbaɗndi 101 tergal tawi ardii ɗum ko diina, teskiingu denndaangal moɓe ɓesngu Gine.
5. Toɗɗagol hooreejo jaagorɓe (hilifaaɓe), gummiiɗo e Doole Guurɗe (Forces Vives) ;
6. Compugol guwarnama ngootaagu Ngenndi ;
7. Ƴeewtagol doggi woote ;
8. Juɓɓingol woote gardagol leydi ɗoo e lebbi jeegoo. Terɗe Diiso Ngenndi e Daawal kam e terɗe CNDD e Hooreejo jaagorɓe e terɗe Guwarnama e Daawal oo, kam e terɗe konu e kisal gonɗe e golle, mbaawaa wonde kanndidaaji e ɗeen woote.
9. Ballitoragol reenooɓe (ƴeewooɓe) siwil en e militeer en ɓe CEDEAO ;
10. Cosgol njuɓɓudi rewindo e ɓeto e ɗofto ;
11. Siifɓe ngalɗoo nanondiral ina ɗaɓɓi e winndere nde wallittaade to bannge politik e ngalu e karallaagal ngam tabitingol toɓɓe kaalaaɗe dow ɗee.
12. Belees Kompawore, hooreejo Burkinaa, kalfinaaɗo dogde e maslahaa hakkunde Ginenaaɓe, ma toɗɗo nulaaɗo keeriiɗo to Gine ngam wallondirde e laamu e mudda ngu.

Jooni hiɗen heɗii, ko woni tun,  waandu  hoolaaki  rawaandu. Ɓoyaama haaleede kono huuwaaka, ko si en yi’ii si hooloɗen.

Kɗl: Ibraahiima Lom Jallo, Madrid, Espaany e Saajo Bah, Nederland.

www.peeral.com