|
22/01/2010 Hanki alkamisa lomto persidan Gine on, Jeneral Seekubaa Konaate sellinii toɗɗagol Jean Marie Dore ngol e jonnde mawɗo jaagorɓe halfinaaɗo ardagol daawal mbayliigu ngal lebbi 6 wano haaldiraa non e aadondiral Wagadugu ngal. Jean Marie Dore ko gooto e mawɓe lunndaare nden. Himo jogii duuɓi 71, ko o hooreejo fedde politik wi’eteende UPG (Union pour le Progrès de la Guinée – Dental yahrugol yeeso wonande Gine). Jibinannde makko ko e perefektiir Yoomu e nder Gine Forestiyeer, lenyol makko ngol ko Mano, taweteengol kadi Liiberiya, jeydungol e Berseeɓe, lenyol Dadii Kamara, on mo aadondiral Wagadugu ngal fawi “fowtere” e mum e nden saare.
Jooni hino heddii anndugol eɓɓoodi nulal (feuille de route / roadmap) mawɗo jaagorɓe on fodde ɗin lebbi 6 sabu alhaali on gaynaaka yewtaneede taho. Fahin hino heddii anndugol si Sonna Raabiyatu Jallo jeyaaɗo e senndikaa on e Jeneral Mammaduba Toto Kamara laatoto cukko makko tippude e ko aadondiral ngal fodunoo kon. Golle Dore ɗen ko moolanaaɗe: hebilugol woote demokaraasiyankeeje arane ɗen e ndii leydi ndi mettaaki demokaraasi gila duuɓi 51. Kono ko ɓuri saɗtude kon ko laɓɓingol leydi ndin e ngardiigu miniteeri’en sabu ko ɗuuɗal e perefektiirji ɗin hino e juuɗe maɓɓe. Si ɓe pottinaaka hino fellitaa ɓe janfoto si woote waɗii. Wi’aama kadi postuuji jaagorɓe 30 no eɓɓanaa ɗowgu aroowu ngun, ɗum le hino ɗuuɗi panndi, hay e leyɗe marɗe ɗen ɗowgu mawnirtaa non! Fiyaake hittuɗo go’o kadi ko gollidugol e Nyaawirde Winndereyankoore nden si hewtii noddugol sariya e tuumaaɓe waɗɗiinde war-hooreeji 28 siilto ɗin. Wota maayuɓe e nder hare demokaraasi yejjite, teeŋtii hannde 22 siilo (sanwiyee), duuɓi 3 ɓaawo warngo 2007 ngon. Ngon kadi ko koninkeeɓe ɓen wonnoo sabu mum, haa hannde ɓe lamnditaaka fii mum. Kɗl: Umar Bah, Otriis. www.peeral.com |
Si laamu ngun hino huutorde ngaluuji leydi fii bhantal leydi ndin e nafoore jamaa mayri on, haray ko dhabbhaa kon fow hebhike. Dhun non gasataa si wonaa e dow potal,nundhal e peewal, bhay demokorasi wonaa ka hunnduko tun , yaaday e kuudhe nafooje leydindi e jamaa mun . hara mo kala
ko yo halfine ka gaynata dhon on tigi wadha ko halfinaa kon no haaniri non ,si ko nyaawoowo o nyawira no sariya on wiiri non hara ndaaraali faale
maa sabu, kadi hara sariyaaji dhin ko fii nafoore jamaa on ,hara wonaa ko tampinire jamaa on ,si wonaa hara ontigi lunndi sariya on.
Dhe egolle dhoo non hino waddhii kala bhiddho gine ,landho ,laamaadho debbo e gorko.Kadi aynoobhe leydi ndin bhen wona faabotoobhe hara wonaa dogetee
bhe maa waroobhe jamaa mun on.SI FEWJOORE MOYYHERE YAADII E KUUDHE MOGHE ,KO NAFOORE HEBHOTOO NANI . Mi jarnii on
(IBRAHIMA LOM DIALLO MADRID ESPANY)