Barack Obama innitii Gine ka tummbo  yeewtere makko State of the Union speech “yeewtere dawla pottal” ɗum ko yeewtere hitaandeyankoore nde waɗata ɗum laamɗo Amerik hitaande kala, o sifoo e mayre eɓɓooje makko e nder hitaande nden.

Ko e nder oo finaa-tawaa woowuɗo,  laamɗo Dawlaaji Dennduɗi maa US, Barack Obama waɗti alhaali Gine e nder yeewtere makko o wi’i: Gine wonii leydi ka ngeenaari e laamu bonngu wonti naamu e laawol laamiiɓe, ka ngeenaari haɗi suka on heɓude golle. ko oo fiyaake haɗi leydi ndin ɓamtal e yahral-yeeso, waɗi kadi ndi tawaa e leyɗe  ɓurɗe e waasuɗude fii kala kene mayri e nder mayri hino heewi tew jawle, keyeeji e oogirɗe.

Barack Obama haaɗaali tun e fennyingol ŋinya alhaali Gine o wi’ii kadi wonde Amerik daroto takko jamaa Gine haa laamu bonngu, nguyaa e ngeenaari acca, wowtale bonɗe fow mula ndi yiita ɗatal. O fodi kadi wonde Amerik wonay tuma kala hiwoowe reena ndimaaku e hakkeeji neɗɗanke.

Ɓaawo jantaade jiɓdu faggude (crise economique) jaaliindu e leydi ndin ko fawi e hitaande, tawi winndere nden hino sortaade e mum seeɗa-seeɗa, ɓaawo hollugol eɓɓooje hittuɗe e makko wano “asuransuuji nyawndagol wonande ɓii-leyndi ndin fow, Barack Obama juhirii jentiiɓe yewtugol sifoo fii leydi Gine. Yeeso cuuɗi Amerik mbatirɗi ɗin ɗiɗi e yeeso Ameriknaaɓe fow.

Yeewtere State of the Union wano woowiri noon, ko yeewtere waɗoore yeeso Senaat on e Galle Lomtiiɓe (House of Reperestatives) on waɗata tawa kadi hino holleede ɗoon-e-ɗoon (en direct) ka teleeji e rajooji, ɗum fuɗɗino gila George Washington arano e laamɓe Dawlaaji Dennduɗi wonti aadi ndi ŋakkataa hitaande kala.

Ɗum ɗoo hollii wonnde laamɗo leydi ɓurndi e doolnude e aduna on majjaaka ko dogata kon Afrik haa hewta Gine, yaka seede cippirooɓe e katante mbayliigu Gine fewndo ɗoo Amerik e moftal aduna fow hino tuɗi noppi.

Hay si tawii goɗɗo waawataa wi’ude ngal hajii ardinooɓe Gine kono gila imminaaɓe Amerik e Faransi fotti e Jeneral Seekuba Konate nder Marok e hoore gunndol ka fuɗɗoode nduu lewru siilo ɗoo, gila on tuma piiji ɗin wa’ii wa si hoyii yaccike. Wi´en tun: Mono yirganeede ka ɓaawo, yo o eto o yirga ka reedu. Ɓeyden dunyude yeeso golleeji men no Gine heɓtira hoore mum, sabuna fewndo ɗoo wallitotooɓe na woodi, hay si tawii ko tono maɓɓe ɓe woowti ardinde yeeso e kala huuwondire maɓɓe wonande leyɗeele winndere nden.

Kɗl: Tijjaani Bari, Faransi.

www.peeral.com