18/02/2010

Keenya (hanki) e alarba  mooɓre jaagorɓe (minista’en) Najeeriya hawrii dow yerɓuki (neldude) jaagorɓe njeegoo (6), ɓe yaha to laamateeri Sawdiya ngam ɓe ndaarana gite maɓɓe fiyakeeji njamu ardiiɗo lesdi on, Alhajji Umaru Yar’aduwa.

Jaagorɓe ɓen yerdi (haaldi fotti) yerɓuki jaagorɓe njeegoo wakkati jaagaro (ministaajo) haajuuji yaasi on, Chief Ojo Madueke nodditi mooɓgal jaagorɓe, ngam ɓe yaha ɓe heɓa ko laaɓi dow Alhajji Umaru Musa Yar’adua, ɓe annda no nyawu makko wa’i, to ngu waawataa mo hokkugol hakkee ardagol kuuɗe lesdi, fuu ɓe anndan to ɓe yi’oyii mo.

Jaagaro (ministaajoo) tayre laamorde  lesdi (FCT) Adamu Alii Yero wi’I, haanaayi ɗum wi’ee Hooreejo lesdi on waawataa ardagol kuuɗe leydi, ɓaawo ɗum o sawri haa laamu Najeeriya nelda jaagorɓe njeegoo, yaha laaroya mo bee giiɗe gite maɓɓe, ndenboo ɓe yetta ardiiɓe laamateeri Sawdiyaa tawon, bako (ko adii) ɓe lorugo Najeeriya, ɓe yetta Sawdiya e dow ballal ngal ɓe hokki hooreejo-leydi maɓɓe. Yimɓe yahooɓe ɓen hawti bee Jaagaro Peturjam Rilwanu Lukman, Jaagaro Durngol Njamu Babatunde Osotimehin, Jaagaro haajuuji yaasi lesdi Ojo Madueke, Jaagaro Ndemri Dr. Sayyadi Abba Ruma e nanta (kadi) koolaaɗo (sakatareejo) laamu lesdi Najeeriya Alhaji Mahmud Yayale Ahmed.

Nder asaweere (yontere) saaliinde (yawtunde) ngomna’en tato immorde suudu diidaaɗi lesdi yahiino to laamateeri Sawdiya, amma ɓe keɓaayi yaake yiiduki e Hooreejo lesdi maɓɓe on.

Kɗl: Kasim Bashir Umar, Abuja, Najeeriya.

www.peeral.com