19/02/2010

Hanki konu Niijer follii laamu Persidan Mammadu Tannja. Ko nyalorma teɗɗan kabaaruuji sifiiɗi fii loowanɗe nanotooɗe iwrude e galle hooreejo leydi on fuɗɗii saakitaade. Wiʼaama ko koninkeeɓe sukaaɓe woni sabu oo kuudetaa e ndii leydi Niijer anndiraandi kuudetaaji heewɗi gila 1974, hitaande folleede persidan arano on ɓaawo jeytaare nden, ɗum ko Hamani Joori.

Laamu ngun halfinaama mbatu inniraangu Conseil Suprême pour la Restauration de la Démocratie (CSRD), e fulfulde mbatu hooreewu wonande artirgol demokaraasi. Ko kolonelɓe tato hawti laamu ngun, halfinaaɗo konngol maɓɓe on no innee Kolonel Gukooy Abdulkaariim. E konngol CSRD, laamɗo follaaɗo on hino wuuri selli himo jogaa e daakorde miniteeri e nder laamorde nden, Nyamee. Ɓe fodii artirgol demokaraasi kono moni kala hino anndi kelɗere konngol koninkeeɓe gila Dadii Kamara mo CNDD Gine, teeŋtii non si ɓe suttii welo-welooji laamu.

Kori ngoo follo laamu sakkitiingo ɗoo yaltinay Niijernaaɓe e iinycuru kanyum e kuudetaaji jokkondirɗi, artira ɓe e laawol demokaraasi e deeƴere?

Kɗl: Umar Baa, Otriis.

www.peeral.com