Kɗl: Umar Bah, Otriis.

Persidanjo kaliifaaku (interim) on, ɗum ko Jeneral Seekuba Konaate siifii yamiroore jaɓirde doosngal leydi (Constitution) kesal ngal. Gila aadi Wagadugu ndin sanwiyee (siilo) 2010, ngoomu innaangu Conseil National de la Transition,  e raɓɓindinaade CNT, e dow ardungal Hajja Raabiyatu Sera Jallo hooreejo gooto e senndikaaji mawɗi ɗin hino halfinanoo ndaartugol doosngal leydi ngal fii no ngal yaadira e mbayliiguuji laatiiɗi e leydi ndin gila timmoode laamu njaggu Jeneral Lansana Konte ngun e riiweede lomto makko on Kapiten Dadis Kamaraa, faalanooɗo kanyum kadi joɗɗingol njaggu mum.

Yoga e kuule waylaaɗe ɗen e doosngal kesal ngal ko ɗee ɗoo: jonnde permiyee ministir (mawɗo ɗowgu) tonngaama e nder doosngal ngal. Gila jeytaare (indépendance) Gine, ɗum laatanooki tawi non hooreeɓe leydi ɓen joɗɗinayno permiyee ministir e wonnde, e wonnde kadi hiɓe waasaynoo joɗɗinde, ko no welirnoo ɓe woo. Kono haa jooni doole permiyee ministir ɓaaraaki e parluman on, ko hooreejo leydi on suɓotoo mo, ko kanko kadi follata mo ko kanko nyaawata golle makko. Ɗii ɗoo alhaaliiji hino yoni ko loi’ini jonnde makko nden.

Kuule go’o kadi ko ɗuytugol happu laamu hooreejo leydi on waɗta duuɓi 5 e dii duuɓi 7 ɗi Lansana Konte waɗannoo hoore mum ɗin. Fahin o haanaa jooɗaade ko ɓuri happuuji 2 (e oo ɗoo baŋŋe kadi doosngal aranal ngal waylano ngam Konte waawa jooɗaade ko ɓuri on dumunna ɗon).

Si yawtii ɗon pehe ɓeydaama haɗooje persidanɓe arooɓe ɓen waylugol doosngal leydi ngal wano Konte waɗirnoo non 2002 fii duumagol e laamu.

Siifannde Konaate ndee arii ɓaawo lurre e dukooji ɗuuɗɗi e ɗee balɗe sakkitiiɗe sabu sentere go’o hino wi’aynoo doosngal leydi gasataa dagineede si wonaa ɓaawo diisondiral jamaa (referendum) ndeya sentere wi’i nde tawnoo leydi ndin hino feewndii e maapere moolanaande sabbagol haa referendum waɗee juutinay laamu daawal mbayliigu ngal (transition) wano woniri e feƴƴirde non Koddiwaar ka laamɗo on, Laurent Gbagbo woni e bugitaade woote saa’i kala gila duuɓi. Hooreejo CNT on, Hajja Raabiyatu wiino kanyum doosngal kesal ngal hino selli nde tawnoo CNT on ko mbatu diisotoongu hawtitungu denndaangal feddeeji leydi ndin, hattanngu lomtaade parluman. E miijo makko, dekere persidan on yonii ko sellina doosngal ngal wonaa haa referendum waɗee. Jooni non Konaate jonnitii mo goonga e dow daraninooɓe referendum ɓen.

www.peeral.com