Kɗl: Algaasimu Bah, Amerik.

Denndaangal leydi Gine ndin hino hormora lewru koorka, juulɓe hino hoora, juula, toroo Allah dokkal barki lewru ndun, e yaafuyee bakkatuujimaɓɓe. Kono ɗum haɗaali Ginenaaɓe toppitaade e muraaɗi dawro fewndiiɗi, wano suɓngooji saatiiɗi nyalnde 19/09/2010. Alfaa Konde e SelluDalen Jallo no jokki nyamal maɓɓe faadee ɓiɓɓe leydi yo suɓo ɓe.

Sellu Dalen e Sidiya Tuure jaɓɓike Abe Sillah:

Sellu Dalen e Sidiya Tuure jaɓɓike Abe Sillah e juma ɓennuɗo, caggal ɗum Sellu yaano Senegal ngam weltanaade Abdullay Wad nde on arunoo Gine fii ɓeydugol diisondiral hakkunde laamateeri ndii e kanndidaaɓe ɓen haa nyalaande suɓngo teeŋtinaa. O juurino kadi  fedde makko (UFDG) nden ton, ɓe du'ondiri maayde koolaaɗo kuuɓal (secretary general) UFDG catal Senegaal nodditaaɗo e lajal mum ko neeɓaali.

O arti Gine kadi kanko e Abe Sillah ɓe yaadi Kinndiya (ɗo Abe jibinaa, ɗo o ɓuraa wootaneede), ngam juuraade mawɓe wuro ngoo. Abe Silla holliti Kinndiya hakkunde kanndidaaɓe feƴƴuɓe ɓen ɗiɗo wonde ko Sellu Dalen Jallo o suɓii,sabu ka tasko makko, himo felliti ko oo ɗoo ɓuri wondude e pehe ɓamtooje leydi ndin. Ɓe jaɓɓaa sanne, Almaami wuro ngoo holli hiɓe iwtiri ɓaawo eɓɓo Abe Sillah ngon, ɓe wootanay kadi Sellu si Alla jaɓii nyannde 19/09/2010. Sidiya Tuure kadi yahii Faransi e battane woote ɗen.

Alfaa Konnde kadi waɗii dental jaayndeyankowal:

Alfaa Konnde kadi waɗii dental jaayndeyankowal (press conference), o yewti ko waawataako sifeede ɗoo fow. Ko ɓuri lollude kon ko tawde o hollii si o laamike njulaaɓe ɓen e leydi ndin jalataa. O waɗii hare makko ɗen liddu yeeyooɓe ɓen. O wii ɓe fow ko ɓe "mafia", e ko ɓen e Sellu o woni ɓe o tiindotoo wonaa lenyol Fulɓe ngol fow, ɗum le 95% e ɓee ko Fulɓe.

Ɓaawo ɗum, o yahii Burkina Faso e hino tamƴinaa o diisondiray e Muusaa Dadis Kamara, tawde feddeeji iwdi Dadis ɗin fow (Forestiye’en) tawtii Alfaa ka foolotiral ɗiɗaɓal woote ɗen. Kono, ella gooto no sonnji Alfaa hannde ko sifa mum alaa.

Ɓaawo warngooji 28/09/2009, Dadis waɗuno yewtere juutunde. E nder ɗum, o sifii ko haawnii fii Alfaa Konnde; o wii Alfaa ko bonɗo mo sifa mum alaa. O wii kadi Alfaa aruno ka jullere laamu makko o yeetii mo yo o geru no o pottinira Sellu ka foolotiro. O wii Alfaa faalaaka fus si wonaa laamaade Gine, o sakkitori wiide Alfaa ligganaaki Gine gila o tagaa, sabu ko wonude yeeso tun o faalaa. Koral(dvd) ndee yewtere saakitaama Gine fow hannde haa jaayndeeji internet Gineyankooji fuɗɗii hollude.Ƴeewu ɗoo:

http://www.africaguinee.com/index.php?monAction=detailNews&id=ɓ484

Ko ɓeydii ɗon, Hajja Raabi mo CNT on jonnii CENI on keesuuje guluuje sappo (10,000) ɗe Kerfala Person Kamara (KPC) mo GuiCoPresse rokkunoo leydi ndin fii suɓngooji ɗin. CENI on kadi hollii ɓe fuɗɗike golle maɓɓe kisan. Ɓe toppitoto humpitugol jamaa Gine on holno woote arooje ɗen wonaa e yuɓɓinireede ngam ɓe waawa wootude e hoore jam.

Ka sakkitorum, hannde rajo Gine fennyinii maayde ɓiɗɗo afo Musaa Dadis Kamara wonuɗo Kanadaa. Ɓe wii o maayii e nder ndiyam to fubborde (yinorde) makko wonunde nder suudu. Si ko goonga, yo Alla hinno mo yaafoo, sabu maayde kan moni kala no yurmi. Kono taw si ɗum no ronka wonude fenaande fii no Dadis artira Gine? Alla tan woni annduɗo.

www.peeral.com