Poliisiiɓe dowla Aadamaawa paamtinii dow[1] eɓe waɗa lincitol[2] ko laarani gorko gooto[3] marɗo duuɓi 32 (cappanɗe tati e ɗiɗi) anndiraaɗo Muhammad Jibriil, jeyaaɗo fattude[4] Wawru Jaɓɓe wonunde nder laamu pamaru[5] ngu Ƴoola Fommbina[6]. Haaloowo e innde poliisiiɓe Dowla Aadamaawa anndiraaɗo ASP Hyelhira Altine Daniel on wii jayndeyankooɓe[7] tippungel (immediately) ɓaawo Muhammad Jibriil warii daada muuɗum, malla mi wi’a neene mum, jooni kanko nanngaaɗo on emo e junngo poliisen, eɓe waɗa lincitol maɓɓe, to ɓe timminii boo ɓe nelday[8] mo to SSS (State Security Service/Reenooɓe Kisal Dowla) ngam ɓe ɓesda lincitugo.
Kanko haaloowo e innde poliisiiɓe ɓen o ɓesdi wiigol nyannde 14 lewru juko (august) hitaande 2010, Mohammed Jibriil fiyii daada mum haa o yahraama nyawndorde, ɓaawo balɗe tati, neeniraawo on maayi. O wii kadin to ɓe timminii lincitol maɓɓe omo tammi yahreego haa hitoordu[9] ngam o hiitee dow ndee war-hoore nde o waɗi.
Muhammed Jibrill eno waɗa hoore mum bano kaangaaɗo[10], kono[11] lincitol maɓɓe kanɓe pooliisiiɓe ɓen hollii omo mari hakkiilo timmungo, o holliti Peeral. ASP Altine Daniel wii fahin ɓe njahray[12] mo to nyawndorde ngam ɓe keɓta goonga hakkiilo maako.
Tippude e lincitol ngol ɗerol Daily Trust waɗi e dow ɗee taƴaale, kanngol kadin ngol hollii minyiraawo Muhammad Jibriil debbo arii to galle daada mum nyannde asewe 14, nde o hewti toon o tawi daada maɓɓe ɗon[13] wondi e soppanɗe hulniiɗe, nden o noddi yimɓe ngari mballi mo ɓe yahri daada maɓɓe to nyawndorde Ƴoola, ko toon Hajja Hajara maayi. Minyiiko on wii gila[14] aran o sawriino[15] daada maɓɓe dow ta o hokku Muhammadu ɗereeji galle ɗen, kanjum woni sababu maayde maako.
War-hoore feƴƴii masiibo, nde neɗɗo tawi maa wara neene mum fii galle.
