Kɗl: Wuuri Jallo, Antwerpen, Beljik. 

Si arii ko yowitii e tele, ko dente nay (4) woodi: ndaarooɓe (yeebooɓe) tele, joom jeeyngal (piblisitee), joom program, e jeyɗo tele.
Ko no ɓee nayo jokkondiri non woni ko faametee si anndee ko waɗee.
Tele kadi hino mari waktuuji no program hollirtee nder ñallal. Kala waktu ko yeeyeteeɗo fii yo jeyɗo tele on heɓtu jawdi makko ndin, o heɓa tono.

Waktuuji ɗin hino seerti coggu sabu ko no yimɓe ndaariri tele woo jeyɗo tele on heɓirta. Tummbere jemma e saa'i hiraande fotataa ndaarooɓe tele.

No faamiren no newori, ƴetten Faransi yeru: kala galle marɗe tele yoɓay laamu ngun ko ɓuri €100 hitaande. Ɗum hawrata ko hedde (telen) €0.25 ñallal. Si tawii laamorde Paris nden hino mari miliyon nayi (4) galleeji jogiiɗi teleeji tawa ko stasiyonji sappo woodi, si stasiyonji ɗii renndinaama ɗi heɓay €1 miliyon ñallal. Kala statsiyon hino waawi heɓude €100,000 ñallal (ɗum ko €2400 nder njamndi kala, si waktuuji ɗin fow tawnaama).
Ñallal ngal hino senndoo pecce nay, kala heen fecco ko njamɗe jeegoo. Si tawii stasiyon hino mari 400,000 teleeji ndaarayɗi nder ñallal, a taway ko ɓuri feccere nden (200,000) ko ka fecco hittungo tawetee, fecco hikkiingo ɗon ngon heɓa hedde 100,000. Si fecco tataɓo ngon heɓay hedde 50,000 teleeji ndaarayɗi, fecco nayaɓo ngon heɓay ko ŋakki ɗum.
Jooni en faamii wondema feccere ko stasiyon on naadata kon (€50,000) ko e fecco arano ngon heɓotoo. Ɗum hawrata ko €10,000 nder njamndi wootiri.

Si goɗɗo hino faalaa hollitude haaju mum tuma nde yimɓe ɓurata ndaarude tele, o yoɓay malla o adda program naadoowo €10,000 nder njamndi wootiri. Si tawii wonaa laamu fawtii stasiyon on, kala heen njamndi hino okka hedde hojomaaji (minitaaji) sappo fii piblisitee. Ko nii njulaaku tele heɓirta fodde €400,000 ka fecco arano tun, tawa jeeyngal (piblicitee) ngal feccere hojom (leƴƴanɗe 30) yoɓinaama €20,000.

Fulɓe hino jooɗii hino wulla, hino faalaa yiide Fulfulde ka tele tawa ɓe ittaali kaalis, ndeke hiɓe waawi heɓorde kaalis nde ɓe heɓi programji Fulfulde si ɓe darnii stasiyon tele. Ko jelu  (no foti) stasiyon darnirtee? Ko Fulɓe njelo wakkilii ittude €10?

www.peeral.com