|
 Innde ngal kawtal feññinanooma gila hitaande 2005, faandaare maggal ko newnangol kala fayɓe jeyaaɓe e leyɗe jolta-ɓamtalje ɗen, heɓugol kiisorgel (portaabul/laptop), fii ɓurtude hoynangol ɓe janndeeji maɓɓe, tawa non ɗin aalaaji hino yooɓinaa internet, tawa kadi wonaa weluɗi bonugol, ko kelɗuɗi, ɓayri paykum no anndiraa liɓugol piiji, ko wano non kadi coggu majji saɗtaa, moni kala heɓiray ɗi no neworii e no hoyiri. Poroguraamuuji ɗin aalaaji, ko heertinaniiɗi eltugol fayɓe, e ko nannditata e ɗum.
Dental leyɗe winndere nden holluno gila hitaande 2006, wondema ɓe wallitoto kawtal OLPC (One Laptop per Child) e ɗin golleeji maɓɓe fii saakitugol gannde kese e nder ɗen leyɗe, yamre aranere nden e eɓɓo maɓɓe ngon innitirano : xo-1,0, nde fuɗɗaa gollireede e jolal (nuwambar) 2007, coggu mayre eɓɓanaa on saanga, kala sooduɗo geɓe 100 o yeeyirte gootel ngel US$188. Ko nii ɓe yahiri haa hitaande 2009, ɓe yaltini kadi yuɓɓorde gollitirnde (système d’exploitation, operating system) hesere, ɓe innii nde : xo -1,5. Hannde kadi, hiɓe humpita yimɓe ɓen wondema ɓe yaltinii yuɓɓorde hesere, hinde wi’ee : xo-1,75, hinde heertori piiji heewuɗi, no tawaa e majji, wonde nde sumnataa laktiriisi ko ɗuuɗi. Yeeyugol nde fuɗɗoto e feccere ndee hitaande ɗoo, coggu mayre kayre yuɓɓorde nden wonoyay US$ 168. Miɗo yelii nde fayɓe Afirik nafitorta ɗii aalaaji, ɓe gollira ɗi ko nafata ɓe, sabu hannde, ganndal waawataa yahude ɓaawo ɗum ɗoo. Janngu ɗoo kadi: http://www.pulaagu.com/index.php?option=com_content&task=view&id=178&Itemid=144 Kɗl: Tafsiir Duntu Balde, Marok. www.peeral.com |
