Hooreejo jogondiral adunayankowal wonande juulɓe ɓen, ko nii siforii rewtagol laamɗo Marok on tuuginorde (constitution) leydi makko ɓaawo nde jamaa on ɗaɓɓirnoo mo ɗum wano ɗeya leyɗe aarabu luttuɗe ɗen waɗirnoo.

Yuusuf Alqaradawi mantii oo laamɗo e nder kutuba juma ka o waɗi ka juulirde mawnde « katar »,  ɗum non ko battane  feññingol Mohammed V laamɗo Marok on e nder golle makko, ñannde 9 mbooy (maarasi) yawtunde, jaɓugol makko rewtagol tuuginorde leydi Marok nden wano jamaa on lamdorii non gila ñannde 20 colite (fabraa’iru) yawtunde.

Ceernoojo on holli fahin, wondema laamɗo Marok on waɗii tiiɗnaare mawnde, o hollii hakkil e kuuɗe makko, o ɗuytitike e laamu makko e baŋŋeeji ɗuuɗuɗi. Ko nii kala jooma hakkil fof haani waɗirde.

Yuusuf Qaradawi, sifori oo laamɗo wondema ko o jooma hikma mawɗo, o noddiri ɗum kala laamɗo leydi aarabu yo jokku ñemtinal moƴƴal oo laamɗo, wondude e etagol no udditirana yimɓe leydi ndin dammbugal diisondiral fii rewtagol tuuginorɗe maɓɓe ko aldaa e hawre.

Yuusuf Alqaradawi oo non, ko kanko wonunoo gooto e aranɓe e nder seerenɓe juulɓe ɓen fof, fewtugol, ɗurnoo ɓee laamɓe ɗiɗo : Jayn Aabidin, e Hosnii Mubaarak, o noddi yimɓe maɓɓe ka ceekol ayaawo « Aljaziira »  e haftaare fii ittugol ɓe, ko wano non kadi ɓaawo haftaare nden Libi waɗude ñannde 17 colite yawtundu, o daginno ƴiiƴam Moʼamar Kaddaafi ɗam e nder « fatwa » makko, o noddi fahin aynooɓe mo ɓen nde ɓe warata mo.

Shayxu Alqaradawi, hino laamii hannde kawtite lislaamuyankooje ɗuuɗuɗe e adunaaru ndun, ko mo jibinannde Misira, ñiiɓuɗo leydi Katar gila ko neeɓi.

E nder jinnduru makko fii yottingol diina lislaamu nder adunaaru ndun, o juurino Marok, o hawrondiri heen e kawtite lislaamuyankooje heewɗe, wondude e feddeeji diinayankooji wonuɗi Marok. Ko wano non kadi, o tawano e waɗuɓe yewtere diinayankoore waɗaynde Marok e kala suumayee (koorka), wondude e laamɗo leydi din, hino wi’ee : « duruus al hassaniya ».

Kɗl: Tafsiir Duntu Balde, Marok.

www.peeral.com