Jooni naatanen hollitde renndo ngoo ko woni ummannde fedde Jaayre Pulaar e nguurndam mum:

Caggal lebbi 12 jawtuɗi dental gootal woodii he internet to senngo Skype

ngal inniraa Dingiral Fulɓe woni ɗo yimɓe kawrinta miijooji mum en ngam ñawndude joote Pulaagu e daranaade ɓamtaare leñol ngol. Yimɓe heewɓe ena kawratnoo to haalirde men Haaƴre Laaw haa ganndondire keɓaa heen, enɗam wuurti , miijooji njultondiri. Ko ndeen udditaare jibini miijo Dingiral Fulɓe to senngo Skype.

Ko adii nde naateten he mbunndi nguurndam Jaayre Pulaar, ena haani njaaren mawɗo men Mammadu Yaayaa BAH mo Wocci e Waalalde caabiiɗo goodal dingiral Fulɓe haa miijooji ndañaa yoo fedde aafe tawa ko heerantoonde goodal haalirde e ayaawo Fulɓe to ngootiri he leyɗe men. Ko ɗiin miijooji ngaddani Fedde Jaayre Pulaar jibineede he gardagol Ibraahiima Kan Katante leñol mo Aañam Yeroyaaɓe to leydi Faransi.

Ndeen fedde ari ko tammbanaade leñol ngol rogere nde heewɓe ngoƴaa tawi noon ena waɗaa diwre sawaawo: Faandaare Jaayre Pulaar ko yoo ɓesngu Fulɓe rentin gannde, peeje e jawdi mum mbele haalirde e ayaawo pulaagu ena dañee to ngootiri he leyɗe men. Fedde ndee ena rentini leyɗe Fulɓe kala e duuɗe ɗe ɓe ɗannorii.  Fedde nde tafiraa ko mbaadi Tabital Pulaaku Winndere. Jooɗorde yiilirde toownde ndee woni ko to leydi Faransi, kono jagge mayre ko cariiɗe he duuɗe ɗee. Batuuji fedde ndee mbaɗetee ko he Skype e ballal Ibraahiima Demmba Jah mo Siñcu bamammbe.

Caggal nde Jaayre Pulaar heɓtinaa he laamu Faransi, nde ummanii hannde ko yoo kala leydi aaf ɗoon cate e peŋɗe.

Dañirɗe fedde ndee ko: Piye (kafuuji), yarlitaare e balle. Mbaadi piye: gonɗo Sfrik fiyata he hitaande ko 1OO (Teemedere) CFA walla njaru mum. Wonɓe he duuɗe keddiiɗe ɗee ko € 20 walla njaru mum. Hitaande kala fiyetee ko laawol gootol. Kala yiɗɓe anndude he nguurndam fedde ndee ko ɓuri yaajde, yo ɓe njokkondir e yiilirde toownde ndee he ɗee jokkorɗe:

Hooreejo: (+33) (0)6 16 28 27 79. Koolaaɗo Kuuɓal: (+33) (0)6 61 46 65 94. Walla mbinndon min he: jaayrepulaar@yahoo.fr

Banndiraaɓe, ko goonga en keewii pelle, kono ko ɗuum waawata wallude en hannde tawa fedde kala ena jogoo ko heerorii to ñawndugol caɗeele men. Yoo won noon he jili men ko enen ndenndi pelle ɗee kala. Hay heen wootere hoto yiiru wonnde ndee ari ko haɓaade ɗum. So en ngoɗɗinii miijooji, en tawat fayndaare ndee ko wootere. Gooto he men ana waawi jeyeede he pelle ɗee kala, tawa omo faami kadi omo faamanaa ko o neɗɗo gooto mo wutteeji keewɗi: kala fedde nde ñalngu mum dawraa, o ɓoornoo wutte mum.

So tawii won dille laaɓndii keewal pelle, fedde kala adda hoolaaɓe mum e dawrugol mum tawa aɗen njananaa (felliti) dentaangal pelle ɗee kaɓantoo tan ko jam Pulaagu, kisal e ɓamtaare mum.

Ko adii tonngugol ndee winndannde, ko jaaroore heeriinde faade he Alhajji Njaay joom ayaawo  2 STV to Senegaal ngam darnde makko e pellital makko. Hay so wonaano geɗal ngal o ittani leñol to ayaawo makko, omo haani jaareede ngati so kala pullo daranike (daraniima) wonde huunde he leydi mum no makko nii, maa leñol ngol teddine he winndere ndee kala.

Fotde men he ko o waɗi koo ko geɗe tati: njaaren mo, mballondiren e makko e moƴƴinen ko o rokki en koo.

Tonngol winndannde ndee ko eeraango: Kala fedde nde ɓiɗɗo Pullo waawi jeyeede, yoo o waɗ yila makko he Tabital Pulaaku Winndere, o jeyee he catal walla peŋgal gonngal he nokku makko.

En meeɗaani dañde fedde rentinnde Fulɓe kala, etee so Tabital firtike (firtiima); mooɓtude Fulɓe he fedde wonnde ko huunde saɗtunde waɗde.

Tabital yoo darano anndude dentaangal pelle Fulɓe he kala ko ɗe mbaawi ummanaade, ngal annda ko ɓesngu maggal, ngal ñoota, ngal fooɗta kadi ngal goongɗinana kala fedde walla teelɗo miijo mum e darnde mum tawa noon angal humpitii ɗuum telɓintaa ko ngal ummanii koo. Njanngen, ngollen, njiɗen ko men tawa aɗen pasnii ko hoɗdiiɓe men. Hoto cerindo-ɗen kono kadi hoto caayen. Nanngen ko men, hoto kappito-ɗen ko jananɓe, nuunɗen he ko ndennda-ɗen.

On njaaraama. Haralleeɓe men ngaafii jaayɗe, kaalirɗe internet e lowe Fulfulde haa ɗeen golle cuusni en ndeke ko ngummani-ɗen koo ena aaɓnoo.

Kɗl: Ibraahiima Umar Kan Katante leñol mo Aañam Yeroyaaɓe, Faransi.

www.peeral.com