Laamu ejipte ɓamiino pellital gila maayirɗe hitaande 2010, ngam artirde Rajo Pulaar/Fulfulde jokka jolle mum e leydi Ejipte. Rajo ngoo fotnoo fuɗɗitaade golle ko e darorɗe ndee hitaande 2011, kono dille baɗnooɗe haftaare (maa filñitere: revolution) e leydi he ñande 25 Siilo (January) waɗi haa rajo Fulfulde waawaano fuɗɗaade golle. Ngo fuɗɗitii ko ñande 6 lewru Yarkoma (oktobur) 2011, tawii ngo dartike duuɓi jowi.

Ko waɗnoo haa Ejipte uddi rajooji keewɗi

E hitaande 2006 laamu ejipte siini pellital uddude rajooji keewɗi kuccitinaaɗi yaasi, foti ko e ɗemɗe Afrik maa ɗemɗe Aasi, wano Bammbara; wolof; Fulfulde; Linngala; Enndo …. ɓe mbiinoo woni sabaabu mum ko caɗeele faggudu, kono na wayno goonga on wonnoo ko waylude dawrugol (politik) maɓɓe. Gila ndeen haa jooni ko Rajo Fulfulde tan fuɗɗitii taho. Na anndaa Fulfulde fuɗɗanooma haaleede e Rajo Ejipte gila 1963, ngo jokki haa hitaande 2006 ngo uddidaa e rajooji janti-ɗen, hannde noon Rajo Fulfulde artii ɗo wonnoo, miɗen torii kala banndiraaɓe to mbaawi wonde yo mballondir e rajo ngoo, to bannge jokkondiral, e miijooji, e lamnde (naamne) maa men neldu on jokkorɗe rajoo ngoo e no ngo heɓirtee, sabu oo yonta gonaaɗo mawɓe rajo ɓee ngoni ko e ñiiɓinde e tabintinde njuɓɓudi golle ɗee.

Rajo “konngol Afrik immorde Kaahira” udditta ñande fof, ko njamndi 6:45 GMT, ko oon waktu woni to hirnaange Afrik, ngo jokka golle haa njamndi 8:00 GMT, woni njamndi e nayaɓal ñannde kal, ngo haalirta ko 17625 KHWS, e wempeƴere 16 meter, ngo huccitinaa ko to hirnaange Afrik, miɗen njoortii maa ngo waaw heɗeede nder Satellite.

Haaliyaŋkooɓe rajo ngoo iwi ko e leyɗe men ceertuɗe. rajo ngo na adda nooneeji jeewte (siriyaaji) ceertuɗi: diina; pine; renndo; weytaare; coftal ɓalli; dawrugol; faggudu; ekn. Maa en ɓeydu laɓɓinde no golle ɗee njahrata, e ko mbaaweten waɗande heɗotooɓe tedduɓe kala ɗo ɓe mbaawi wonde.

Yo Geno won ballo haa eɓɓooreeji men fof mbaawa hantaade, o barkina kala ko heɓaa heen.

On njaaraama

Kɗl: Abdu Bah, Kaahira, Misra.

Tel: 00201006294217

www.peeral.com