Adobe Flash Player not installed or older than 9.0.115!
Adobe Flash Player not installed or older than 9.0.115!
Freetown: LAJ wii wata fanɓe ɓen aanu panndi
Friday, 20 January 2012 15:30
Alhaji Bah aka[1]LAJ wi’ ii no toroo fanɓe mum ɓen fow wata ɓe ukko e yennindirde e añɓe makko ɓen fiikala ɓen no weltii hannde ko tawi kon innde makko nden no tawaa e nduu jiiɓoldu yowitiindu e kon ko waɗunoo to amirde Office e asewe yawtunde, yo fanɓe makko ɓen jokku yewtere addoore jam hakkunde Salonyankooɓe fow. Pellet himo hoolii Alla yaltinay mo e nduu jiiɓoldu, kadi fewndo ɗoo wonaa ko woni haaleede kon, kanko himo e jam, kadi o jogaaka.
O wii himo toroo yo Alla yurmo yaafoo ɓen maayuɓe e kan aksidan e asewe yawtunde.Ko LAJ woni jogiiɗo raaya hiphop kan fewndo ɗoo e nder leydi Sarlon, himo yiɗiraa wa hooreejo leydi. Ko kanko woni ko itti ɗum e junngo Kao Denero mo Black Leo Movement yeɗanooɗo kan raaya laabi ɗiɗi si LAJ waawi ittude ka e juuɗe makko. Gooto kala no jogii daakorde mum kamɓe ɗiɗo, wano no Tupak e Bigi jogornoo ɗum e nder Ameriki, huunde addunde pooɗondiral hakkunde maɓɓe haa wonkiiji ittaa.
LAJ e Kao Denero fow ko e nder Ameriki daakii, hino hulaa wata won ko pooɗondiral wonnoongal hakkunde Tupak e Bigi ngal ɓe woni ñemtinde. Meeɗii nde fanɓe maɓɓe haɓi e nder Freetown haa laamu ngun ukkii hakkunde maɓɓe dartini coftale diɗɗe hiphop ɗuuɗuɗe, sabu caɗeele kisal ko ɓe wonnoo addande leydi ndin.
LAJ yaltinii kore (albums) wano Talk Of Salone 2. Himo yima e Enngeleere, Kiriyonre e Fulfulde. Si neɗɗo heɗitike gimi makko ɗin o taway ko ñaaɗuɗi alɗuɗi, noddooji foolotiral mawngal hakkunde naalankooɓe. Goonga ko Algaasimu Bah mo Afrikan Flava haali kon, si laamu ngun yiilii golle maɓɓe ɗen no haaniri non, toppitike ɓe, ɗum no waawi addande leydi ndin nafoore mawnde hella ka wallude sewɓe (sagataaɓe e curbaaɓe) fii heɓugol golle e ndee hanndeere saɗiraande ko gollee.
LAJ ka hello mum to Facebook no weltanoo fanɓe mum ɓen fow, himo toroo ɓe kala to ɓe woniri wata ɓe aanu, kadi wata ɓe ukko e yeddotiral puuyngal ngal nafataa Sarlon e Liyonyankooɓe.
Alhaji
