E nder ndii hunndaari (taariindi), to piiji fow yeñi, saare mawnde to yimɓe fow faalaa tabitude, sabu no e nder mayre ɗate mawɗe, ɓowrinaaɗe yor, e kuuranji jalbuɗi tal, paykoy no mawna ko yaawi sut, a wayray boobohum gorum maa deyum ko penuwel, e nder duuɓi seeɗa si a yiitii mo a faytay mo few; a annditataa mo hakkee ko o mawni, tiiɗi, labaa.

Jooni toragol jiwo wonaa ko newii weeɓi; wonaa ko weli-fii, sabu jiwɓe ɓen e mawɓe mum no saatinira feere (ɓurɓe ɓen), adunaaru ndun e pine mum kese kañum kadi no golla fotde mum e ngoya senngo .

Ko onon yo janngooɓe Peeral tedduɓe, miɗo faalaa (yiɗi) weeɓitande on ko yowitii e yeewtere jiwo e nder kaa filla.

Moodi (Md) Mammadu e sonna mum Aaminata jiidike (jibinii, dañii) ɓiɓɓe worɓe e rewɓe, ɓe ne’ii ɓe haa ɓe mawnii; ɓe naadi ɓe to janngirde ɓe janngi jannde fewndiiɗe, ɓe naadi ɓe ka duɗe ɓe janngi diina e needi fii no ɓe wonira yimɓe timmuɓe ɓe wuura nguurdam yimɓe faamuɓe, sabu wonaa ɓanndu ndun waɗata ɓiɗɗo aadama on neɗɗo, ko fittaandu (ruuhu) makko ndun.

Tawi non iwdi Md Mammadu ndin ko iwdi yimɓe diina, needi e ganndal, ko yimɓe jogitiiɓe pine maɓɓe ɗen kadi anndiraaɓe pulaagu.

Afo maɓɓe on ko gorko, himo innee Hammadi, o wonii suka timmuɗo. hikkiiɗo (heeduɗo) e makko on ko jiwo, himo innee Sira, o hewtii toreede. Kala yiiɗo mo ko wa makko faaletee. Maama makko to senngo baaba nuli e ɓiɗɗo maɓɓe on yo o okkitir jiwo on.

Yaaye jiwo on, tokora jiwo on, taninoke mo fii suka maɓɓe on Ganndo gila nde o wonnoo boobo.  Ganndo ko paykum (cukalel) janngukum wa dille, ko Alla waɗata kon ɓay O waɗataa ko haanaa. Jaka suka on no nawni nawnaare nde ndikkataa; ɗoo yo dewgal hume tawi lajal makko timmii. Yo Alla hinno mo yaafoo mo !!

Jiwo on no mawna tun, ganndal makko no ɓeydoo, yimɓe tedduɓe e lo’uɓe ka ɓeynguure e jananɓe fow no sappoo mo, no yeloo yo o wonu ɓeyngu maɓɓe…

Hee ! Koo ko yimɓe ɓen haynii (soynii) ɗoo hewtii ko feeña yelaare, ɓe tawi yo ɓe ɓanngin faale, faɗoowo faɗa, heɓoowo heɓa.

Wano no woowiri non musidal ngal ko yo accu haa jananɓe immora baŋ-woo-baŋ, si kamɓe kadi ɓe memminoo; awa kaari mo kaari kadi no faalaa, kɗw[2] musidal no jogitii, ɗum  no hulɓinii nde laawinoo!

Cowndi ɗin no yottinee tun.

Kawtal maɓɓe tawi ɓe : Kotoo Mammadu, Alhajji Usmaani no holli lam fii jiwo mon on, ko fii ɗum  rewni lam to mon gaa.Moodi Mammadu: Awa on jaaraama, jooni on rewtoyay e nder balɗe, nden wooday ko mi humpita on, si Alla jaɓii.

Kɗl: Cerno Nuuhu Jallo, Gine, Konaakiri.

Konngol Peeral Media: Kaa filla no juuti, ko ɗum waɗi men fecci ka e callalal binndanɗe, ɗe saakitirte wootere wootere haa ka timma. Artee janngon ɗe yowon men annda miijooji (miilooji) mooɗon. On yettaama sanne.

www.peeral.com