“So ɓee anyii men haa ɓe waririi men gooto-gooto ngam yo men ɗalu men acca janngugol pulaar, ɓe gaynataa, ɓayri so ɓe warii men ɗoo men yiitidoyay laakara toon men waɗa duɗe amen men jannga, men janngina pulaar.” Ko aan Mammadu Samba Joop “Murtuɗo” haalunoo ɗum. Ka won-ɗaa fuu Moodibbo, nyalnde 26 bowte (dujambar), si a jalaano weltaare woo a moosuno ko neeɓi. Nyaalande nde teddiniraɗaa, innitiraɗaa, tawa kadi fof feƴƴirii no yiɗirɗaa noon.

Puɗi ɗi aawunoɗaa fuɗii, mawnii, wilitii, wirfiɗii, ɗowdinii, okkii dimɗe. Ɗemngal ngal yanngani-ɗaa, tampan-ɗaa hannde hino layude rewra juri e laawi ɗi fertiɗaa. Kalfe e jannde ko tawuno-ɗaa hino sinta etiɗaa yo wonu caangol neeɓataa tawa wontii maayo ngo ɓeeɓataa. Yimɓe ɓe mooɓtirno-ɗaa janngin-ɗaa, waaji-ɗaa hannde hino yuɓɓini nyalgu teddinir maa; ɓe waɗi gimɗi ɓe waccu maa. Yiɗuɓe ma haa ɓurti hannde haa hawitii ɓe etii sifagol nguurdam maa, e kuuɗe maa golle maa seeɗa, ɓaryi haalude golle maa ɓe tawuno ɓe gaynataa. “Mammadu Sammba Joop  kam ko maayo, kala ka iwtir-ɗaa a taway ko ɗoon ɓuri mawnirde”, Habi Jakariyaa Konte.

Nyalngu Pinal  KJPF, Catal Noisy-Le_Sec  Faransi, nyannde 26/12/2009.

Golle heewɗe nafoore waɗaama e leydi Faransi ndin e ndee nyalaande ɗoo, golle yowitiiɗe e pinal Fulɓe kanɓe e naatnaatondiral jananɓe e nder leydi ndin. Nden nyannde golle hittuɗe ɗe binndol waawaa huɓindaade siinaama, yimɓe kelɗuɓe hooloraaɓe tawtoraama, fow kadi taskinoke wonde njuɓɓudi golle ɗen pellet hay si ɗoftaaka sabu leelude arude yimɓe ɓen , golle ɗen sinirano no fotiri e no weliri, haa yimɓe fow weltii, alaa tawtoraaɗo mo weltanooki nden nyannde, teeŋtii non feddeeɓe Peeral tawtoraaɓe ɓen tato : Saajo Bah, Usmaanu Sheehu e Tijjaani Bari wonɗo sabu haa Peeral tawtoraa e ndeen nyalaande.

Meɗen yiɗi jantaade e ngol ciimtol yoga e ko waɗanoo e ndee nyalaande Pinal inniraande ceerno men mawɗo, mo kala katante anndi, oon woni Cerno Murtuɗo Joop.

Ndeen nyannde tawi hoɓɓe arii haa heewii weernaama, soƴƴaari senndaama nyaamaama haa haaraama, yaraama, tawi kadi gila law filmuuji Fulɓe fijinaama, hono Baaba Maal e hiirdeeji mum welɗi yuɓɓinaaɗi to RTS e ko nanndi e mum… e njamndi 16 :45 golle jeewte ɗen fuɗɗi :

Hooreejo Catal KJPF Noisy-le-Sec Ceerno Sammba Cooyel Bah udditi mbatu ngun, udditiri ngu weltanagol nootiiɓe fuu, yaafnii e leelude fuɗɗaade golle ɗen hono lelniranoo non, o sifitini wonde ndee nyalaande ko Cerno Murtuɗo teddiniraa ɗum…hino waɗɗii en mawninde golle makko haa nyemtinen mo e majje ɗe fuu, sabu ko kanko woni barogal barooɗe, tawi kadi kala to ndaarirɗaa e fannuuji, a taway himo golli e mum ko ɗuuɗi, gila e dawrugol, faggudu, renndo, ɗemɗiyankaagal, aan limtu…fahin o yottini konngol ngol e kalfinaaɗo pinal on ngam hollita jamaa aruɓe ɓen no ginol golle nyalngu ngun lelori non, e mbayliigu seeɗa ko naati heen kon, oon ne ari holliti. Hino jeyaa e ko o jantinoo ɗee toɓɓe arooje les ɗoo :

-Yeewtere Nguurndam Ceerno Murtuɗo Joop

-Nguurndam sukaaɓe ɓe iwdi njananiri e nder leydi Faransi…

-Jime e yimiyankooɓe hono Demmbel Sal, Katante lenyol, Kaaw Tuuree, Habi Jakariyaa Konte …

-Gimi sukaaɓe Noisy-le-Sec e ardagol Katante Lenyol

-Hiirde Daawuuda Jeey, naalanke men mawɗo annduɗo

-Rokkugol seedanteeje inniraaɗe “Maande teddungal” faade e rewɓe tiiɗniiɓe daraniiɓe ɓamtude renndooji men…

Ko ɓaawo ɗum Dr. Mammadu Dem fuɗɗi yeewtere yowitiinde e nguurndam sukaaɓe jananɓe e nder leydi Faransi: caɗeele nguurndam maɓɓe, gila nde ɓe naati lekkol, nguurndam maɓɓe to lekkolji, to galleeji mawɓe maɓɓe e tuma ɓe woni yaasi galleeji maɓɓe, taariindi maɓɓe. Peeral hino etaade no heɓira ndee yeewtere no nde diidori non, nde saakitee haa nafoore ndee ɓeydoo yaajude…

Mammadu Jallo, laabiyanke (awoka) golloowo ɗoo e Faransi waɗii yowre wondunde e fiira ko yowitii e sukaaɓe bonnuɓe malla ɓe inɗe muuɗum tuuni, e no ɗum nyawndirtee… 

Ɓaawo Dr. Mammadu Dem timminii yeewtere mum nden, lamnde werlaa, o jaabii haa timmii tis, ko on tuma Ceerno Ibraahiima Kan mo Tabital Pulaaku, catal Tijjaani Aan, ari naatani toɓɓere gimi sukaaɓe Noisy Le Sec, ɓaawo anndinde seeɗa no ngol gimol hebliraa e dumunna daɓɓo, hanki muuɗum, e ɓaawo weltanaade jaarna nootiiɓe fuu, sukaaɓe ɓen fuɗɗii yimude: Banndiraaɓe, KJPF Noisy le Sec salminii on, hino ardii ɓe suka gorko e suka debbo, ɓe yimi haa gasi, kelle saaƴi haa juuti, ɗe helti, yimɓe fow weltii, seyii masin e ngol gimol heewngol nafoore e teddungal, teeŋtii non so tawii ɗum ko e sukaaɓe men jibinaaɓe ɗoo iwi…

Ɓaawo ɗum gasii, gooto e sosnooɓe ngal ɗoo catal inniteeɗo Yaayaa Alfaa Jah, waɗi yimre daɓɓere hirjinoore e daraandaade pine men e iwdiiji men. Hannde tawi e nder tawanooɓe ɓen ɗoo fof, ko kanko tun lutti e ɓen sosunooɓe ngal catal ɗoo, yimɓe fuu weltii kadi, haa yottii e ɓen darinooɓe e sincude KJPF e kuuɓal, e Cerno Yaayaa Alfaa Jah e keertal…

Nde o timmini nden, banndiraawo men debbo ganndo ƴetti yeewtere ngam haalude e nguurndam Ceerno Murtuɗo Joop, ko on wono Sonna Habi Jakariya Konte. Hino woodi ko taskaa e yeewtere makko ko o suuti e nder jeewte Ceerno Murtuɗo Joop, o wi’ i:

Ko Pulaar ɓurani lam neene am

Ko Pulaar ɓurani lam baaba am

Ko Pulaar  ɓurani lam ɓiɗɗo am mo mi jibini

Ko Pulaar ɓurani lam debbo am mo mi resi

Sabu so Pulaar wuurii mi wuuray

So Pulaar maayii mi maayay…

Nde ndee yeewtere timmi, yimiyankooɓe ɓen nodditaa jooɗii addiri jime mum’en gooto gooto, e ardagol Ceerno Mammadu Abdul Sek, ɓurɓe ɓen yimi jime tati, kono Ceerno Abdul Sek yimi wootere pet.

Yoga e ɗen tiitooɗe ko nii lelori:

Mammadu abdul Sek yimi yimre: Miɗo Huli.

Demmbel Sal, jime tati ɗe o yimi ɗen ko: Nyoƴƴitel, Ndonu; e Yahoowo.

Ibraahiima Kan (Katante lenyol) yimi tati, na jeyaa e majje: Haayoo Ceernoo Murtuɗo e Tenngaade.

Kaawu Tuure yimi yimre: Murtuɗo yahii waynaaki e ɗiɗi goɗɗe

Habib Jakariya Kontee yimi: Tijjani Aan

Fewndo ɓee yimiyankooɓe yimata tawi Daawuuda Jeey hino hoɗa hoddu mum welndu hino ɗowta yimiyankooɓe, haa gasi, tawi kala heen yimre hino Joopii Ceerno Murtuɗo Joop malla waaɓe wano makko e no fotuɗen ƴeftirde golleeji men, ɓe joofini, ɓe welni ƴem. Pellet e nder kan dumunna woodi wulluɓe sabuna jime goo ko tawno na yurmi sanne… 

Nde ɗum ɗoo fof gasnoo hiraande sennditaa, yimɓe nyaami yari haa haari tef, weltaare na ɓeydoo, hay gooto yiɗaa yahude Alla e welde nyelngu ngun…e nder muuɗum tawi filmu Nyalngu Pinal Jowol (Fuuta Tooro) hino yeeɓeede, nyaamaa haa gasi.

Ɓaawo nde hirtanoo haa gasi, golle jokki, yeɗude seedanteeje: Maande Teddugal hewti. Ɗee ceedanteeje ko rewɓe anndiraaɓe darnde mum e ɓamtaare renndooji men yeɗaa ɗum, sonnaaɓe ɓurɓe 20 e gorko gooto tawanooɗo e sincuɓe KJPF Faransi: Alfaa Yaayaa Jah, ko ɓeen yeɗanoo ɗeen seedanteeje…

Hino winndii e ngal seedantaagal koo ko arata ɗoo:

Maande Teddungal

Catal Nuwaasi-le-Sec ngal Kawtal Janngooɓe Pulaar-Fulfulde he Winndere ndee to leydi Farayse (26/12/2009)

Amin mbeltorii teddinirde ma ndee maande he nyalngu pinal taddiniraangu Ceerno Murtuɗo Sammba Joob ngam teskaade darnde maa he ɓamtaare lenyol Fulɓe.

Hino jeyaa e yeɗaaɓe ngal seedantaagal, ɓee sonnaaɓe arooɓe les ɗoo:

Aysata Kan, joom suudu Cerno Saydy Kan. Aysata Bah, joom suudu Ceerno Saydu Bah (hooreejo KJPF). Aminata Nyaŋ, joom suudu Sayku Umar Bah. Habi Jakariya Kontee, debbo ganndo waɗuɗo yeewtere nguurndam Murtuɗo Joob. Jaynabu Jallo, sonnajo jeyaaɗo leydi Gine. Sonna Hadiyatu Jallo, jeyaaɗo leydi Gine kadi.

E woɓɓe goo hono Pennda Jaawo, Sonna Jiye Faal, Sonna Diiye Bah, Sonna Faama Lih, Sonna Hawwaa Daaf, Sonna Dooro dem, Sonna Leelɗo Saakoo, Sonna Jaar Tummbu, Kummba  Kudi Jallo, Sonna Haayre Njaay, Sonna Maama Arɗo Soh… e woɓɓe ɓe men jantaaki teddirɓe hono ɓee jantaaɓe ɗoo.

Nde ɗum fof timmunoo, hiirde nden udditi, Daawuuda Jeey hoɗi hoddu mum no waawiri hino yimira daande mum welirnde no njumri, himo adda jimi welɗi, hay Mali Saajo yimaama nden nyannde, Peeral kadi faɗaano hay huunde ka waccoore…

Ɓaawo seeɗa naalanke debbo gooto kadi ari yimi e soninkoore kam e Fulfulde, ko on innetee Sira Daraamee, ko wela daandeejo, yaltinɗo koral (album) mum inneteengal Sehilbaabi, ko neeɓaali, hino weli haa maayii.  Ko nii yahri haa njamndi 11:00 e pawdi, on tuma hiirde nden joofi e hoore jam e moƴƴere, yimɓe saakii na weltii, yooɓii seyo e weltaare.

Hooreejo catal ngal jaɓɓitii kala tawtoraaɗo, gila immiiɓe Mantu La Jolii, hono hooreejo KJPF Faransi, Ceerno Saydu Bah, e feddeeɓe Peeral e kala arunooɗo e nguu nyalngu heewngu fiira e nafoore.

Cerno Murtuɗo men hewtinii ma ngol ciimtol, men ɗowtirii ngol weltaare lenyol, ka wonɗaa woo men yettii ma, men toraniike ma weerde ɓurnde toowude to aljannaaji; yo Alla hebbin hono maa hakkunde amen ngam yo men waawu jokkitaade golle maa, men tammbitoo ndonndi maa, no yiɗirɗaa noon no faalirte-ɗaa noon. 

On jaaraama.

Kɗl: Saajo Bah, Tijjaani Bari e Usmaanu Sheehu, ka nder suudu Tijjani Paris (Faransi).

www.peeral.com