|
Kɗl: Tayyib Soh, Antwerpen, Beljik. Peŋgal Tabital Pulaaku Faransi anndiraangal Tabital Pulaaku Ganndal Fulfulde (TPGF) jooɗiingal e laamorgo ndiin leydi, Paris, yuɓɓinii ɗon nyalngu pinal nyande hoorebiire 22 duujal 2010. Nyalaande ndee ko nii feƴƴiri : Gila bimmbi ɓe puɗɗi jaɓɓaade yimɓe ummoriiɓe e leyɗe walla nokkuuji seertuɗi. Hooreejo tedduɗo oo ƴetti konngol ngam hollude wellamma mum, o hiwrii jamaa oo e innde makko fawtii heen o hiwrii ɓe e innde TPGF o wi’i ‘saɗi ko tooli’ , o bismii jamaa oo ɗo paltooru alaa.
Nyaameteeji e njaram ummorii banngeeji fof (Barinaaɓe nyaami haa cuumti). Noon tan tawi Dura Bari natti waawde jooɗaade, o wulli o yimi mawɓe e sukaaɓe caati kelle ina mbeltii, mo kala ina wi’a hannde ko hannde mum. Woni seeɗa joom gannde en ngoni e siimtude ina cifoo ngonka mawɓe men hanki. Ceerno Tijjaani Mbaalo ƴetti konngol hiwrii, bismii e innde Tabital Pulaaku Orop o holli wellamma makko e ndee nyalaande o sifii no Fulɓe hanki en wonirnoo leydi Faransi. Hooreejo TP Itali (Fedde Fulɓe Itali): Ceerno Bootol Bah rokkaa konngol o holli weltaare makko. Horeejo TP Faransi, Ceerno Aamadu Usmaan Bah hokka konngol, o bismi, o holli weltaare makko e weltaare Fulɓe Faransenaaɓe.Ɗoon tan jom gannde en cuppiti, ƴettuɗo konngol fof a yiɗataa o deƴƴa, ɓe sifii nguurndam Ceerno Mammadu Sammba Mommbeya, baɗnooɗo nguurndam mum fof sadaka ngam yoo Fulɓe ɓamto. Nde ɗuum feƴƴuno,hikkii ɗon ko nyaaƴo (deefilee) boomi e surgaaji, ɓeen kadi kolli ɓoornungal Pullo hanki e nder yonta mum, ɓe holli kadi hono surga hanki resiranno, e hono jombaajo hanki dammbortonoo…eknTuma fof ɓe fooftoroo Dura Bari.Nyande Dewo 23 duujal 2010. Tabital Pulaaku Orop fiɓii batu ngam heyɗitinde yiilirde e wostandirde hakkillaaji .Batu nguu udditiraama konngol hooreeje tedduɗo oo, oon woni : Ceerno Tijjaani mbaalo: o hiwrii, o bismii, o yamiri tawanooɓe ɓe mo kala yo innito, ɓaawo ɗuum o ƴetti konngol o holliti ginol golle ngol o totti Koolaaɗo Kuuɓal tedduɗo oo konngol, hono Abdurrahiim Jallo. Oon waɗi ciimtol golle Tabital Pulaaku Orop laaɓngol, o tuggi gila o falfinaa haa yottii nguun nyalngu, o hoolliti eɓɓooje Tabital Pulaaku gila ko huuwaa heen haa e ko etaa heen, haa ko tonngano accira noon, eɓɓoore heen fof o laɓɓinani jamaa oo holko haɗi ɗum siineede, ko ɓuri heewde e eɓɓooje men ɗawi en ɗum ko baasal baasal baasal ngalu!Ɓaawo (keeci) ɗuum Hooreejo catal kala hokka konngol, hono Itali, faransi, Beljik, Gabon. Hooreejo Faransi oo holli wonde so go’o bonii, limoore ayiima (aalike), o wi’i ella mawɗo ina e yiilirde Tabital Pulaaku Winndere haa teeŋti e Koolaaɗo Kuuɓal maɓɓe hono Ceerno Siisee. Ceerno Siisee noddata, winndata, so winndaama walla noddaama o dillata! O lamndii gila Koolaaɗo Kuuɓal oo jooɗii holko o meeɗi waɗande lenyol ngol ? Holi humpito ngo o meeɗi yuppande en? O holli wonde foti jooɗanaade lenyol ko neɗɗo tiiɗaaɗo pinal, baawɗo munyal nyootoowo hakkunde yimɓe …ekn, kono wonaa jooɗiiɗo tan ina dooyo, tawa so wonaa ko addanaa addataa !Hooreejo TP Gabon, Ceerno Siree Soh : holli neɗɗo so nafataa hay mbabba (ngorba) na ɓuri ɗum, sabu mbabba kam so fayii ina rimndee. O holli yontii rentude kono kadi o faanditaaki e rentude hono dental goolooli, ngootu heen fof ina ridda ngonngu ngu. O wi’i kadi kala mo ina ardoo lenyol yo taw ko kanyum e hoore mum yiɗi. O holli goomuuji daraniiɗi pinal Fulɓe ɗi fof poti ko liggadaade, kala tergal waɗa fodde mum, hay gootal tawa yeebaaka, hay gootal ɓurnaaka, ko noonne kadi jaasnaaka yeru: so en njiɗii waɗde ayaawo habrirde walla ko woni fof tawa kala tergal ina wi’ee addu ɗum, wona huunde happaande (dottaande). So tawii eɓɓo ina huuwee yo kala catal Tabital Pulaaku walla fedde Fulɓe fuu fawe fodde ko haani faweede…Maa en njokku e winndannde men aroore… www.peeral.com |
Haray meden sabbii winndannde (2) nden, yo Md Tayyib.
Golle mon hino mahii, darii haa tiidi.