Kɗl : Wuuri Jallo, Antwerpen, Beljik.

E nder cate Tabital Pulaaku Orop ɗen, hino nanndi wa si ko catal Itali ngal tun woodi si en taskike no feddeeɓe maggal fotata. Catal Itali hino limi 1600 feddeejo, catal Faransi non ko hedde yimɓe 250 mari. Cate goo anndaa hay limoore yimɓe mum.
Ɗum hino addi lam e lamnditaade ɗee lamnde:

1. Ko ko pinal leydi Itali ngal seerti e pine leyɗe Orop heddiiɗe ɗen, kaa ko seertugol pinal laamiiɓe cate ɗen, waɗi yo catal Itali ngal ɓuru marude yimɓe;
2. Si tawii famɗude ɓii-feddeyaagal ko tawde naatooɓe e fedde ko Fulɓe jeyduɓe e anndindirɓe tan;
3. Si tawii ko maranɓe Pulaaku kiram yarliiɓe ko'e mum tan naati e ɓii-feddeyaagal;
4. Malla ko kuuɗe feddeeɓe ɓen woni raɗaade haɗa yimɓe naatude ɗee pelle.

Yo ɗii miijooji yowo tawo ka hakkil mem haa laƴƴiren gite e haaju hawniingu hollitaangu ka mbatu. Nguu haaju ko ɓittingu woɓɓe tawanooɓe, ko ngu ɓuuɓtinngu ɓerɗe woɓɓe goo. Wonaa  fii ko yiilirde Tabital Pulaaku Orop nden ronki itteede Faransi naɓee Beljik (tawde catal ngal hesɗinaali yiilirde mum) kon wonu-mi haalude; wonaa hay lure ɗe catal Beljik ngal mari nder mum ɗen faandii-mi, wonaa kadi caɗeele jokkondiral yiilirde mawnde Tabital Pulaaku Winndere (jooɗiinde Mali)  e cate ɗen faandii-mi. 

Haaju nguu ko ngu Wuuri Jallo holliti ko yowitii e jannde Fulfulde e ngalu Fulɓe, ko o tawanooɗo oo e sosɓe Tabital Pulaaku duuɓi sappo yawtii jooni, Wuuri Jallo fuɗɗuno catal  Baljik feewtungal e faggudu. Eɓɓooji makko wonnoo ko fuɗɗorde alɗingol Fulɓe fii no Pulaaku tabitira, sabu baaso ɓamtataa hisintaa hoore mum saka o waawa ɓamtude miijo malla pinal.

Ɗum fow hino weli nanude, kono... Ko hunɗum sikkataa si Pullo wi’ii ma himo waawi jannginde Fulfulde o yoɓa janngoowo on haa €2000 lewru kala? Hino gasa halfinaaɗo mbatu nguu tawno hino hummpitii fii ngoo miijo, ngam waano wa si yoga e tawanooɓe yiɗaano heɗaade haala Wuuri Jallo kan, hay si tawii o okkanooma konngol koɗo gila ka fuɗɗoode mbatu.

Si wonaa sabu anndunooɓe Wuuri, seedinooɓe ko o waɗunoo fii Pulaaku ɓen, nguu mbatu gasayno tawa fensitaaka ko honno yoɓirten Fulɓe si ɓe janngii Fulfulde. Waano wa si ɓitteende nden ɗuytortaa hay anndugol wondema hay gooto fawaaka yoɓangol ngoo eɓɓo. Hay anndugol wondema ko njamdi wootiri pet pullo janngata ñallal o heɓa yeru €60 ɓeydanaali woɓɓe hoolaare maa softeende. Min le ko ɗum ɗoo woodi ko mi haala:

Si Fulɓe waasii anndugol no baawgal Fulɓe ado-hannde fotirnoo e hakkunde leƴƴi, si Fulɓe waawii hoolaade neɗɗo fow hino adda miijooji moƴƴi si wonaa Pullo (tawa Pullo ko yo luttu tan e ñembugol ko woɓɓe goo fuɗɗi), haray (taway) hay si malaa'ikaaɓe asamaanu aranu ngun fow renndii ɓamtugol Pulaaku ko mehre yaltata.

Pellet si Ameriknaajo lawƴinii Pullo yoɓii mo €20 fii njamndi wootiri, ko o du’anteeɗo teddinee. Jooni si miijo yoɓugol Pullo €60 njamndi wootiri, fii tan himo jannga ɗemngal makko addanaama fedde anndiraande eɓɓo fottingol Fulɓe ɓurɓe miliyon 65 e nder leyɗe ɓurɗe noogay, wota ngoo miijo welsinde.

Barki Alla e ko hooreejo Tabital Pulaaku Orop (Bappa Tijjani Mbaalo) bismii o weerni ngoo miijo kon, hiɗen waawa fuɗɗaade ngoo eɓɓo nder lewru e innde Tabital Pulaaku, si fedde nden jaɓii halfineede yiilugol eɓɓo ngon.