Kɗl: Tijjaani Maalun Bari, Paris (Faransi).

Ɓaawo o ndaarii haa huunde juutii-luttii o soynike ka haawagol kii ŋari muginki oo neɗɗo ; ɗoo yo o jalu weltaare, ko gonɗi makko hibbi, tawi le wonaa o haanunooɗo wullugol. Ko ɗen gite makko ɓinnyuɗe o punnorii jowli naangal nagal hay o hinƴaali, hay o aamaali.

O fonti juungo ɓadnitugol e makko oo jooma ndii tagudi moƴƴundi. Jooma mbooɗam ɗam sugu mun alaa sifa alaa nando ka nder winndere. A sikkay falaaɗo nangude bollam yiite, o huliti o dartii ; ɓernde makko pippiti, refti nde udditii. Wonkii iirii, hakkille oori.

Nde wootere tun o ɗiwti, o heɗitii, o nani colli no yima, o nani hitooji no nootitoo e hakkunde ayɗe Fuuta. A wi’ay wonnooɗo e nder koyɗol ɗenƴii o nani Maalun hino ewnoo. Embere ko o waawi fow o nani oon no wi’a : Ko oo ɗoo min kadi mi yiɗi. Oo dey hino yoni ko yiɗee.

Min kadi wano majjuɗo ɗatal e nder laawi Paris feƴƴumi miɗo nyuncoo ; miɗo sowndoo e nder ɓernde am ngol gimol yuɓaangol e ɗemngal Fulfulde miɗo wi’a:

Giggol Harmaa

Ko an woni yiɗoowo mo anyataa

Weli woo metti woo giggol maa waylataa

Bimbi e kiikiiɗe giggol maa jaasataa

Bimbi weetuɗo woo no toowa ngol jolataa

Ko duuɓi duuɓini woo gilli ɗii hiɗɗataa.

Si ndiyam saaƴu maa naangal tuɗaa

Keyeeji ɓernde ɗii nyolataa, yoorataa

Hay leydi taggaa wa gatal ɓaaraa

Pelle e kaaƴe mun mooɓaa duufaa

Conndi e ndoondi mun seɗaa ruuyinaa

Hay gabbun ustotaako, ngel ruuyataa

Ka nder mowre giggol maa, nden dillataa.

Ɓuɓɓuuru giggol hino ɓeydoo, saayataa

Nder diidere giggol hiɗen awƴa en ƴawataa

hiɗen loƴoo e maayo maggol en yaltataa

hiɗen yooloo kono faabo en hu’ataa

hewtude fonngo, en faalaaka , en eɓɓanaa

kori accee welduɓe lootoo luƴoo

wonkiiji maɓɓe weltoo, ɓerɗe fowtoo

loƴiiɗo giggol sondotaako o maayataa

Hay si ko wiira weela, men faalaa

Seelee men, ko kuuɗe gigol men feetaa

Si ko wuurdude poomaa hara sertataa

Yiɗindirɓe ɓee dey ! yelii, faalaa,

Wallee, rerɗinee ɓe, wondigal hoyaa

Nde teŋe hunaa, goro bolondaa haɓaa, firtaa.

Fii am, o jaɓii, hay o haɓaa, o firtaa

O taƴiraa wa kucum, maa o ɓooraa o piyaa

O aamataa, yiɗugol lam, o somataa o haaɓataa

Fii am o punnoto jowli naangal hay o hinƴataa

Fii makko mi tamboto ƴulɓe giital mi so’ataa

Fii am gurdan makko saɗtaa mayde o hulataa

Fii makko, sadaka wonkii hay mayde mi hulaa

Ka ɓernde makko mi hoɗii ton gooto naatataa

Min kadi ko kanko mi reeni heddiiɓe mi ndaarataa

Giggol amen no tinndaa heɗitii colli no yimaa

Giggol amen no hiwaa heɗitii ayɓe no woyaa

Giggol ko ko yelaa heɗitii yiɗuɓe no jalaa

Kankan kankan giggol ko neema wa mun alaa

Kono ko si tawii tun ontigi no yiɗaa, yiɗaa

Giggol ko neema kono mo yiɗaa anndaa

Giggol ko dakamme kono mo yiɗaaka so’ataa

Lewnyaa, haaɗaa kono mo anndaa, anndaa

Mo mettay njuuri giggol ndope nyaaki o hulataa

Ko ko boni kon toŋaa giggol kan bonaa

Mo wuurii yiɗaali on wuuri no weelaa

Mo wuurii yiɗaaka on wuuri no wulɗaa

Mo wuurii alaa giɗo wuurii no meeyaa

Lammaa, haaɗaa, rijjaa giggol lewnyaa lensaa

Ko ko boni kon toŋaa, giggol kan harmaa.

Ko yiɗugol mo hanndaa e giggol ŋinyaa

Yiɗugol wano maa ko ko yelaa, yelaa.

Ndaaree, tefee haa anndee si yiɗee ko oyaa

Ndaaree, soynee, jikku tefee ɗum ko ɓeyaa

Nanugol innde maa yonii ko waɗa haa yiɗeɗaa

Yi’ugol mbaandi maa yonii ko waɗa haa yiɗeɗaa

Jikku maa suuɗaaki an dey a bonaa a kaanaa

limtugol ŋari e jikkuuji maa goɗɗo huɓnataa

Mbaadi maa, ŋari maa si mi limu mi moftataa

Iwdi moƴƴundi e dammbe maa neɗɗo eɓɓataa

nandintinaade e maa an ! ontigi suusataa

Mbooɗam e moƴƴuki jaka ! Ko ka maa hajjataa

yi’ugol wa maa saɗii, hay gooto ɗum yeddataa

Ko saɗi kon no satti ka coggu ɗum a yeddataa

hucci foti fewti fooli, a foolii fii maa Fuuta’taa

Ko ko boni kon toŋaa, giggol kan harmaa.

Ko yiɗugol mo hanndaa e giggol ŋinyaa

Yiɗugol wano maa ko ko yelaa, yelaa

www.peeral.com